Forumi Horizont (http://www.forumihorizont.com/index.php3)
- Kombetarja Shqiptare (http://www.forumihorizont.com/forumdisplay.php3?forumid=240)
-- Kombetarja Shqiptare (http://www.forumihorizont.com/showthread.php3?threadid=1801)

Trajneri i kombëtares vlerëson fitoren, duke e lënë të hapur të ardhmen e tij në stolin kuqezi
Brigel: Shqipëria tregoi karakterin

Trajneri gjerman i kombëtares shqiptare, Hans Peter Brigel menjëherë pas fitores 3-1, mbrëmë, ndaj Gjeorgjisë ka folur për shtypin: "Dua të them se bëmë një ndeshje të mirë, veçanërisht pjesën e dytë. Bëmë disa gabime dhe na mungoi pasimi i fundit, por në pjesën përmbyllëse të lojës arritëm të bënim korrigjimet e duhura. Pas humbjes në Gjeorgji, mendoj se skuadra tregoi karakter. Dua të vlerësoj disa nga futbollistët e rinj, që bënë ndeshje shumë të mirë. Për Beqirin jap vlerësimin më të mirë, sepse nuk bëri asnjë gabim. Ndërsa Shkëmbi dha prova bindëse se në të ardhmen do të jetë regjisori i ekipit kombëtar. Ai më bindi edhe gjatë seancave stërvitore, ndaj vendosa ta aktivizoja titullar. Për vazhdimësinë time në krye të ekipit do të vendos në fillim të tetorit, pas bisedës që do të bëj me presidentin Duka. Gjithashtu, do të diskutojmë për futbollin shqiptar në tërësi. Deri tani jam i kënaqur me rezultatet e arritura, sepse nuk mund ta mendoja që një vend i vogël si Shqipëria mund të fitonte çdo ndeshje. Në këto ndeshje treguam se kemi mundësi për më shumë për të ardhmen," - ka thënë Brigeli, duke e lënë të hapur të ardhmen e tij në krye të stolit të kombëtares kuqezi.


--------------------------//////////////////--------------------------

Starova: Kjo skuadër ka shpirt të madh
"Të gjitha pikët skuadra jonë i ka marrë në Tiranë. Pra, dy fitore dhe po kaq barazime. Kjo tregon se ne kemi ekip dhe forca e tij është shpirti i skuadrës. Rinovimi i ekipit po bëhet gradualisht. Sot u pa aktivizimi me sukses i Shkëmbit, riardhja e Beqirit, Haxhit, etj. Kjo është një fitore që na gëzon, sepse arritëm të merrnim 8 pikë në një grup mjaft të fortë. Unë dëshiroj që këto rezultate të mund të ndikojnë te trajneri Brigel për ta bindur të qëndrojë në krye të ekipit. Ne shpresojmë që në të ardhmen të kemi arritje edhe më të mira dhe të shoqërohen me fitore jashtë fushës sonë."