Forumi Horizont (http://www.forumihorizont.com/index.php3)
- Arkivi i Politikes (http://www.forumihorizont.com/forumdisplay.php3?forumid=322)
-- Burracaku Berisha (http://www.forumihorizont.com/showthread.php3?threadid=13256)

Burracaku Berisha

Duke parathene se jam 100 per 100 dakord me cfare thote Nano ne kete artikull dua te shtoj edhe rastin e zgjedhjeve te tanishme ku Berisha "skarikoi" shpejt e shpejt Olldashin per hubjen kur te gjithe e dime mire qe ne rast fitoreje merita do ishte totalisht e berishes.

 
Berisha, një burracak që mbjell frikë

Mustafa Nano
Tash një vit e kusur prej ditës që Berisha ka riardhur në pushtet, ka qëlluar shpesh, që miq, kolegë, dashamirës, lexues të vëmendshëm të shkrimeve të mia e ndjekës gjithashtu të vëmendshëm të kuturisjeve të mia nëpër studio televizive e nëpër beteja publike, të më këshillojnë të bëj kujdes e të jem më i përpjesëtimuar në qortimet e kritikat e mia ndaj Sali Berishës, pasi "atij, dhe bandës së tij, nuk u zihet besë". Kanë dashur të më thonë me këtë, se unë duhet të ruaj kokën. Dhe merret vesh, që koka mund të ruhet ose duke e qepur gojën, ose duke dhënë opinione të rrumbullakosura, të cilat as nuk shpojnë, as nuk ngjisin.

Të them të drejtën, bezdisem sa s‘ka ku të shkojë nga kjo këshillë. Bezdisem së pari, ngaqë e di që te kjo sindromë kolektive, Berisha sheh të konkretizuar bash atë që ai ka planifikuar në mënyrë metodike të mbjellë me sjelljen e tij publike e politike. Dhe, me ç‘duket, ia ka arritur qëllimit. Sidomos brenda Partisë Demokratike, ku nuk pipëtin asgjë në asnjë rrethanë. Bezdisem së dyti, ngaqë kjo sindromë është një lethal weapon për energjitë civile të shoqërisë. E di që apatia e shoqërisë së sotme civile në Shqipëri shpjegohet më së shumti qoftë me faktorë të tjerë endemikë e tradicionalë, qoftë me përpëlitjet e shumë aktorëve të saj në luftën për të siguruar "kotheren e bukës" për vete e për familjen e tyre (kjo përpëlitje, në mos është korrupsion, pjell korrupsion), por edhe kjo klimë frike luan një rol jo të vogël për ta mbajtur këtë shoqëri të çmobilizuar e vështirësisht të mobilizueshme.

Ndonjëherë, përballë atyre që janë më të sigurt tek ajo që thonë, gjë që e demonstrojnë duke më rrëfyer dëshmi të dëgjuara nga gojë miqsh, apo gjëra që i kanë hequr vetë mbi kurriz, e lë shtirjen mënjanë, dhe pohoj zëplotë, se po, edhe unë e besoj që berishianët e kanë qejf dhunën ndaj kundërshtarëve të tyre, por jemi në vitin 2006, dreqi ta hajë, dhe gjatë gjithë këtyre viteve, ata duhet të kenë mësuar ta latojnë disi instinktin e tyre të dhunës; me këtë dua t‘u mbush mendjen bashkëbiseduesve, se Shqipëria e sotme, e cila është shumë e ndryshme nga Shqipëria që la Berisha e të tijtë në vitin 1997, në mos i shkurajon këta mujsharë, i bën të jenë sidoqoftë - pa dëshirë - më të sofistikuar në ushtrimin e zejes së tyre; dhe kjo do të thotë se janë të detyruar t‘i vënë disi fre tundimit për të marrë me të mirë e për të ledhatuar pulsionet e tyre të egra; kjo do të thotë më në fund, se do t‘u duhet të mendohen mirë përpara se të derdhen me grushte mbi një gazetar të njohur.

Në të vërtetë, kjo është ajo që kam menduar. Dhe thellë-thellë, ajo bezdia, që provoj pas këshillës që më japin të tjerët për t‘u ruajtur e për të qenë më i kujdesshëm, vjen edhe prej faktit që ata më ngacmojnë një "plagë të hapur". Unë, si të gjithë ata që kanë guxuar të jenë të zëshëm me kritikat ndaj Berishës, kam frikë gjithashtu. Po si e kam mundur këtë frikë? Në të vërtetë, nuk është se e kam mundur; unë bashkëjetoj me të prej vitesh. Nëse them diçka më shumë e më fort se ca të tjerë, këtë e bëj, ngaqë nuk mund të mos e them. Nëse do të heshtja, nëse do ta mbaja veten peng të kësaj frike, nuk di pse mendoj se do të sëmuresha. E di që, ndërsa nxjerr e ngre zërin, frika është aty, brenda meje, por dobare nuk sëmurem. Kaq e thjeshtë është puna. Dhe do të ishte për të qeshur, nëse lexues të mi do të merrnin për qëndrim heroik atë që në të vërtetë nuk është gjë tjetër, veçse një zgjedhje "pragmatike" në të mirë të kararit tim të brendshëm.


* * *


Frika është një nga gjërat më njerëzore. Të gjithë - duke përjashtuar nga njëra anë një pjesë të sëmurësh mendorë, e nga ana tjetër një pjesë fanatikësh të dendur me dogma e me ideale - kanë frikë. Por kjo s‘do të thotë amá, se nuk ka njerëz që janë më shumë apo më pak frikacakë se të tjerët. Fjala vjen, Sali Berisha, në kundërshtim me ç‘mund të mendohet prej atyre që e rrethojnë, është një burracak par excellence. Ai është para së gjithash e mbi të gjitha një burracak. Është i tillë edhe ngaqë bën çmos ta fshehë që është i tillë. Në një intervistë, që i kam marrë për televizionin A1, në prag të zgjedhjeve të 3 korrikut 2005, pyetjes sime se "a mendoni ndonjëherë për vdekjen? Çfarë mendoni?", ai iu përgjigj me një frazë, që ta rrëqeth mishin më keq sesa vdekja vetë. "Është gjëja që më shqetëson më pak se çdo gjë tjetër", tha ai. Edhe një kamikaz, që ikën me bujë e vullnetmirë nga kjo botë, pasi i janë shpëlarë trutë prej një didaktike të urrejtjes për jetën tokësore, me siguri nuk i ka të rregulluara për fare e mirë hesapet me vdekjen. Është e zorshme të besosh, se kamikazët ikin nga kjo botë të zhveshur krejt prej mundimit ekzistencial, i cili - sido që t‘i vijmë rrotull - lidhet kryesisht me vdekjen. Ndërsa Berisha thotë, se "(vdekja) është gjëja që më shqetëson më pak se çdo gjë tjetër". "Çfarë kafshe heroike!", do të thosha për të në rast se do ta besoja. Mirëpo, ata që i njohin pozat e tij shtinjake, e kanë shumë të lehtë të thonë: çfarë burracaku! Nuk di pse burracakët i përfytyroj gjithëherën si njerëz të mbërthyer prej makthit konstant të vdekjes, të cilin (makthin) ata tentojnë ta mundin duke mos folur për të (vdekjen). Burracakët janë të terrorizuar prej vdekjes. Ndoshta, edhe të poshtrit.

"Kish frikë prej vdekjes, tamam sikur të ish i poshtër" - kjo është një thënie balzac-iane, të cilën shkrimtari i madh francez e shtie në punë për të karakterizuar një prej personazheve të tij. Më ka mbetur aq shumë në mendje kjo frazë, me përmbajtjen e së cilës jam dakord edhe sot e kësaj dite (nuk më kujtohet tani në cilin libër të tijin e kam hasur), sa gjatë gjithë kohës, në mënyrë gati instiktive, e kam parë veten në grackën e çalltisjes për të gjurmuar e matur frikën te të gjithë njerëzit e poshtër, që kam njohur. Dhe pothuaj në të gjitha herët kam konfirmuar atë që ka paralajmëruar Balzac-u: njerëzit e liq janë përveç të tjerash edhe burracakë.

Vini re: nuk po them që frikacakët janë njerëz të liq. Po them bash të kundërtën: njerëzit e liq janë frikacakë. Nëse shfaqen ndonjëherë si njerëz që fqinjërojnë më lehtë e më shpesh se të tjerët me vdekjen, kjo nuk ndodh ngaqë janë trima e të guximshëm, por ngaqë jeta që bëjnë mes lakmish e gjakimesh të shpërpjesëtimuara e të pakontrolluara nuk u lë shans tjetër, veçse të fqinjërojnë lehtë e shpesh me vdekjen. Dhe në këtë mes nuk e kam fjalën vetëm për njerëz të poshtër që i janë futur botës së krimit; e kam fjalën edhe për njerëz të poshtër, të cilët gjakojnë pushtet me çdo kusht e me çdo çmim, e të cilët nuk duan t‘ia dinë për asnjë parim e ideal (prandaj janë të poshtër) në përpjekjet për ta fituar këtë pushtet.

Sali Berisha është njëri syresh. Ka mbi dhjetë vjet që nuk guxon të shkelë në vendin e tij të lindjes, ku trembet, se - po të shkonte - do ta prisnin guerilas të motivuar prej politikës së tij sektare. Është kjo politikë e tij sektare - përveç të tjerash - që e shndërroi në target të këtyre guerilasve vrastarë edhe Azem Hajdarin, udhëheqësin e lëvizjes studentore të vitit 1990. Kryeministri shqiptar është i lirë të shkelë në çdo qoshe të Shqipërisë, të Evropës e të planetit, por ai nuk mund të shkelë atje, ku ka lindur e ku është rritur. Mund të hyjë pa asnjë problem në çdo bastion të së majtës shqiptare, ku do të gjenden se s‘bën njerëz që do ta presin të papenguar nga askush me bujë, me lule e me tam-tam-e, por nuk mund të hyjë në zonën e Tropojës, banorët e së cilës janë në shumicë dërrmuese mbështetës të tij. Në fakt, duke e marrë me mend se ç‘e pret atje, ka të drejtë të ketë frikë (dhe në këtë pikë, duhet mirëkuptuar), por është absurde të mendosh që ne shqiptarët kemi për kryeministër një njeri, i cili nuk shkel dot në vendin e tij të lindjes; nuk shkel dot, ngaqë i duhet të ballafaqohet me përthyerje të dhunshme të politikës së tij sektare.

Kjo është arsyeja, që e bën atë të jetojë prej gjashtëmbëdhjetë vjetësh i rrethuar me roje të shumta trupi. Të gjithë udhëheqësit e tjerë politikë e shtetërorë të Tiranës mund t‘i shohësh të rravgojnë si njerëz të thjeshtë nëpër rrugët e Tiranës, të hyjnë fillikat nëpër kafené apo të shkojnë diku vetëm me njerëzit e familjes, ndërsa Sali Berisha as që e ka çuar në mendje ndonjëherë të luajë qoftë dhe për një gjysmë ore rolin e një qytetari të zakonshëm të Republikës së Shqipërisë. Çuditërisht, kjo gjë ishte më e papërfytyrueshme në periudhën 1997-2005, në të cilën ai ishte një opozitar "qyqar". Në këtë periudhë ai ishte i terrorizuar nga pushteti, të cilin e etiketoi gjatë gjithë kohës "vrasës", ishte i terrorizuar nga policia e nga shërbimet sekrete shqiptare, nga shërbimet sekrete të huaja, nga grupe terroriste kinse të sponsorizuara nga e majta në pushtet, të cilët ai i denonconte pareshtur në konferencat e përditshme për shtypin.

Zhurma që bënte - sa kohë që ish në opozitë - mbi pushtetin "vrasës", nuk ishte gjë tjetër, veçse një mënyrë për të mbuluar frikën, që e ndjente nga drejtime të tjera. Në fakt, nëse ka pasur një shqiptar të mbrojtur në mënyrë të posaçme nga pushteti "vrasës" i të majtëve, ai ishte Sali Berisha, të cilit qenia në krye të Partisë Demokratike i jepte një impunity të plotë. Fatos Nano, më shumë sesa veten mbronte Berishën e sulmuar nga lloj-lloj paranojash. Kur ky i fundit mori vendimin për të vizituar qytetin e Vlorës, ku nuk kish guxuar të shkonte për tre vite me radhë pas vitit 1997, u mobilizua e u vu në mbrojtje të tij e gjithë policia e Republikës. E Berisha hyri në Vlorë e doli nga Vlora, pa harruar të stiste e propagandonte anën ngadhënjimtare të këtij gjesti. Në fakt, e gjitha ishte "vepër" e Kryeministrit Fatos Nano, i cili së pari, nuk donte t‘i jepte asnjë casus belli kryeopozitarit prore të kreshpëruar, së dyti - në emër të nonchalance-ës së tij prej mejhanexhiu urban - nuk bëhej merak për pozat heroike të rivalit të tij. Berisha e ngrinte gjithë "trimërinë" e tij mbi këtë shkujdesje hedoniste të Nanos, të cilin megjithatë nuk ka ngurruar ta etiketojë kot më kot si vrasës të shumëfishtë (edhe si vrasës të Azem Hajdarit). Duke mobilizuar të gjithë makinën e tij mediatike e propagandistike në funksion të krijimit të idesë, se kryeministri e pushteti ishin vrasës, ai e kish më të lehtë të shiste për trimëri të gjitha akuzat gjëmimtare kundër pushtetit, të cilat i bënte çdo ditë ku të mundte e si të mundte.

Por punët ndryshuan, kur socialistët zgjodhën për kryeministër Ilir Metën. Dalëngadalë, Berisha u bë si pulë e lagur. Po ndjente se përballë kryeministrit riosh e rishtar, që guxoi e shkeli Tropojën nën breshëritë e armëve të guerilasve berishianë, nuk e kish më atë impunity, që "ia kish falur" regjimi nonchalant i Fatos Nanos. Vizita e Metës në Tropojë, e cila u filmua nga kamerat televizive, e zgërlaqi për fare "malësorin trim mbi trima". Pak më pas, Meta u shty edhe më tutje: policia një ditë prej ditësh bëri ndalimin për disa orë të Berishës. Në rrethana të tjera, pas një gjesti të tillë, Berisha do kish tentuar të ngrinte më këmbë gjithë mbështetësit, të cilët një urdhër i tij i bën të dalin me vrap nga shtëpitë e të derdhen nëpër rrugët e sheshet e Tiranës. Por, atë radhë, Berisha nuk u ndje. Shqiptarët patën rast të bënin sehir ca kohë, se si contest-i politik i dominuar gjatë gjithë kohës nga xanxari Sali Berisha zuri të dominohej nga xanxari Ilir Meta. Nuk e vranë mendjen kushedi se çfarë, që po lindte një mujshar i ri, i cili po njësoj s‘donte t‘ia dinte për rregulla loje e për shtet të së drejtës. Ndalimi për disa orë i Berishës dhe shoqërimi i tij në një prej rajoneve të policisë ishte bërë në fakt, jo thjesht me dijeninë, por me urdhrin e Kryeministrit Meta. Ishin ditë të trishta për Berishën, por ishin gjithashtu ditë të trishta për pjesën civile e civike të shoqërisë shqiptare, teksa po kuptohej se një mujshari të politikës mund t‘i vihej kufiri te thana, jo prej qasjeve ligjore të shtetit e prej repulsionit moral të shoqërisë, por prej një mujshari tjetër.

Në mos, prej ndonjë njeriu me pamjen e namin e një bounty hunter-i. Një ditë të tetorit 2006, ndërsa Berisha lëshonte breshëri sharjesh e akuzash nga foltorja e Kuvendit në adresë të deputetëve të opozitës, u pa dikush të linte ndenjësen, të çohej më këmbë e të merrte rrugën serbes-serbes drejt Kryeministrit, i cili e kish lënë foltoren tashmë e kish zënë vend në poltronën e vet mes ministrave. Ishte Paulin Stërkaj, një ish-polic i regjimit të Berishës I (1992-1997), sot socialist pa dashje e deputet me dashje. Kamerat që filmonin live skenën, sillnin në ekran shtatin e ngjeshur rrondokop, shpatullat e gjera dhe hapin e tij të qetë drejt tribunës, gjë që krijonte përshtypjen se deputeti ish i sigurt në atë që po bënte. Zuri t‘i drejtohej Berishës me fjalë që nuk dëgjoheshin pa u çuar ende nga vendi, e sa më shumë afrohej, aq më i rënduar bëhej gjestikulacioni i tij. "Bo, bo, tani do ta godasë Kryeministrin", kanë menduar të gjithë ata që e njohin Stërkajn. Berisha vuri maskën e murrëtyer, dhe u pa të mblidhej e të bëhej një grusht. Nuk bëzajti atë copë herë, në harkun e së cilës Stërkaj përshkoi rrugën nga fundi te kreu i sallës së Kuvendit, dhe në momentin që e pa veten të mbrojtur nga gardhi i oficerëve këmbëshpejtë të sigurisë, u rigjallërua si me magji, u ngrit më këmbë, dhe zuri t‘i hakërrehej deputetit "të fortë". Kureshtja u shua disa orë më pas. Berisha i trimëruar prej rojeve të trupit, që i rrinin si parzmore, i kish drejtuar Paulin Stërkajt një lumë fyerjesh e sharjesh, dhe në fund fjalët: "Ta çaj kokën! Bir bushtre!" Hajde Kryeministër, hajde! Si lum ne për të!

Sqarim mbi M. Nanon

Mustafa Nano eshte nje nga kritikuesit me te forte te Berishes. Militantet do mendojne se ka bindje te majta, por pakush e di se Mustafa Nano ka qene anetar dhe mbeshtetes i PD-se ne vitet e para te saj. U largua nga Shqiperia kur PD ishte ne fuqi te plote dhe iku ne Napoli, ku beri pune krahu per disa vjet. Me pas u kthye serisht ne Shqiperi.

Rezultati: Mustafa Nano e njeh Berishen me shume nga c'mendojne njerezit, ka patur te beje me te edhe personalisht. Keto qe shkruan nuk i vijne nga fantazia, por e ka studjuar ate njeri deri ne detaj.

Ore parafoles po s"late te zi pa hedhur mbi shqiperine dhe institucionet shqiptare.Po si sju vjen turp dhe si skuptoni qe ne kete menyre godisni dhe veten tuaj te paren.Harroni qe berisha me te mirat dhe te keqijat eshte zgjedhur me shumicen e votave te popullit.
Fajtor forumi tend jo vetem qe nuk eshte i panshem por eshte kthyer ne nje organizate partie ashtu sic jane shume media ne shqiperi qe sju dihen burimet e financimit.
Personalisht dyshoj qe ti dhe forumi yt financohet nga segmente te partise socialiste .
Ti artum je vetem nje vegel qore je nje gur shahu

Po normal mer Varka, se deri para zgjedhjeve ishte e kunderta dhe s'po thoshte gje njeri. Tani qe Berisha humbi zgjedhjet dhe jane rritur kritikat nuk te pelqen ty.

Leri keto Varka dhe lexo temen. Mustafa Nano nuk eshte i rrjedhur dhe nuk besoj se mund te vihet ne diskutim nga anetaret e PD-se qe adhurojne prijesat e tyre totemike. Aq me teper duhet pare nga vijne leksionet. Ti hyn cdo dite dhe shkruan ne cdo teme 1 rrjesht ne mbrojtje te klanit tend partiak dhe ke kurajo te japesh leksione per paanshmeri. Meso te diskutosh me dy rrjeshta njehere pastaj ec e analizojme bashke cfare eshte politika e paanshme.

P.s. Nuk me habit aspak qe ve ne dyshim forumin dhe financimet. Eshte metode klasike per te perdhosur dicka qe nuk pelqehet. Dhe nuk eshte as hera e pare qe paturpesia e segmenteve militanteske perballet me realitetin e internetit duke aplikuar te njejtat koncepte manipuluese qe shikohen ne partite ku ti mund te kesh qene anetar. Ose se paku ne sistemin politik ku je mesuar te luash me forma partiake.

Leri keto Varka dhe lexo temen. Mustafa Nano nuk eshte i rrjedhur dhe nuk besoj se mund te vihet ne diskutim nga anetaret e PD-se qe adhurojne prijesat e tyre totemike. Aq me teper duhet pare nga vijne leksionet. Ti hyn cdo dite dhe shkruan ne cdo teme 1 rrjesht ne mbrojtje te klanit tend partiak dhe ke kurajo te japesh leksione per paanshmeri. Meso te diskutosh me dy rrjeshta njehere pastaj ec e analizojme bashke cfare eshte politika e paanshme.

Mesohu ti japesh vleresimet nga vlerat dhe jo nga sasia .Une nuk shkruaj ketu ne forum per te mbajtur gjalle shpirtin e kundershtimit sepse duket qarte kjo e fundit mungon.Une sdi te bej lojra fjalesh por e kuptoj qe kritika jote perkthehet lehte ne nje deshire megjithate qe te mos i jap ngjyra personale po ti kthehem dhe njehere kesaj teme .Ti me thua qe te degjoj mustafain per gjera qe une i kam jetuar pesonalisht.Po te jap nje shembull konkret nga shkrimi i mesiperm:
mustafai
Kjo është arsyeja, që e bën atë të jetojë prej gjashtëmbëdhjetë vjetësh i rrethuar me roje të shumta trupi. Të gjithë udhëheqësit e tjerë politikë e shtetërorë të Tiranës mund t‘i shohësh të rravgojnë si njerëz të thjeshtë nëpër rrugët e Tiranës, të hyjnë fillikat nëpër kafené apo të shkojnë diku vetëm me njerëzit e familjes, ndërsa Sali Berisha as që e ka çuar në mendje ndonjëherë të luajë qoftë dhe për një gjysmë ore rolin e një qytetari të zakonshëm të Republikës së Shqipërisë. Çuditërisht, kjo gjë ishte më e papërfytyrueshme në periudhën 1997-2005, në të cilën ai ishte një opozitar "qyqar". Në këtë periudhë ai ishte i terrorizuar nga pushteti, të cilin e etiketoi gjatë gjithë kohës "vrasës", ishte i terrorizuar nga policia e nga shërbimet sekrete shqiptare, nga shërbimet sekrete të huaja, nga grupe terroriste kinse të sponsorizuara nga e majta në pushtet, të cilët ai i denonconte pareshtur në konferencat e përditshme për shtypin.

E kupton tani qe ky person eshte verbuar nga urrejtja qe ka per kryeministrin.Sbesoj qe ka shqiptar te paanshem qe do te besoje qe sali berisha del gjithmone me roje te shumta edhe kur ishte ne opozite ,une kam qene sdudent ne tirane dhe gjithmone eshihja berishen gjithmone me kembe te shoqeruar nga politikane te tjere dhe pa roje.95-00
mustafai
Pak më pas, Meta u shty edhe më tutje: policia një ditë prej ditësh bëri ndalimin për disa orë të Berishës. Në rrethana të tjera, pas një gjesti të tillë, Berisha do kish tentuar të ngrinte më këmbë gjithë mbështetësit, të cilët një urdhër i tij i bën të dalin me vrap nga shtëpitë e të derdhen nëpër rrugët e sheshet e Tiranës. Por, atë radhë, Berisha nuk u ndje.

Ky mustafai i napolit duket qarte qe eshte merzitur me faktin qe berisha e perballoi me qetesi ate situate ( ne te cilen i ndodhur vetem me jozefina topallin ne benzin e tij dhe jo me shume truproja sic thote me lart autori,u tentua qe te ngrihej me vinch per ta cuar ne komisariat).Arrestimi i berishes ishte nje kurth i kompozuar per te perseritur nje 12 shattor te dyte.Fakti qe berisha veproi me gjakftohtesi sot gjykohet si frike , sbesoj se dhe ti fajtor je i nje mendimi me mustafain.
mustafai

Në mos, prej ndonjë njeriu me pamjen e namin e një bounty hunter-i. Një ditë të tetorit 2006, ndërsa Berisha lëshonte breshëri sharjesh e akuzash nga foltorja e Kuvendit në adresë të deputetëve të opozitës, u pa dikush të linte ndenjësen, të çohej më këmbë e të merrte rrugën serbes-serbes drejt Kryeministrit, i cili e kish lënë foltoren tashmë e kish zënë vend në poltronën e vet mes ministrave. Ishte Paulin Stërkaj, një ish-polic i regjimit të Berishës I (1992-1997), sot socialist pa dashje e deputet me dashje. Kamerat që filmonin live skenën, sillnin në ekran shtatin e ngjeshur rrondokop, shpatullat e gjera dhe hapin e tij të qetë drejt tribunës, gjë që krijonte përshtypjen se deputeti ish i sigurt në atë që po bënte. Zuri t‘i drejtohej Berishës me fjalë që nuk dëgjoheshin pa u çuar ende nga vendi, e sa më shumë afrohej, aq më i rënduar bëhej gjestikulacioni i tij. "Bo, bo, tani do ta godasë Kryeministrin", kanë menduar të gjithë ata që e njohin Stërkajn. Berisha vuri maskën e murrëtyer, dhe u pa të mblidhej e të bëhej një grusht.

O fajtor per mua ky eshte gjoja analist sepse eshte munduar te godase berishen aty ku berisha ka nja nga pikat e tij me te forta trimerine.Perpiqet mustafai te beje te paminduren te mundur por ky shkrim i tij eshte koke e kembe nje farse.Paulin sterkaj ka qene nje oficer madhor ne policine e shtetit ne 1994 1996 dhe jo nje ishpolic.Jo pa qellim mustafai jot i anashkalon faktet fajtor por meqenese shumica ketu se ka idene pa jau them une si eshte e verteta per paulinin.Paulin sterkaj ka qene drejtusi i operacionit ku u rrahen perkrahesit e ps ne sheshin skenderbej ne tirane 27 maj 1996.M e urdher te tij eshte bere masakra e pleqve perballe pallatit te kultures.Asnjehere su mesua perse ai e dha ate urdher por dihet boterisht qe ai pas disa ditesh u shkarkua me urdher te berishes.Qe prej asaj dite ai kaloi ne anen tjeter me ps persa i perkt revoltes se tij ne parlament ai u akuzua direkt nga sala si dhunues i votuesve qe ai perfaqson dhe si shkeles ligji.T ani sipas mustafait sala duhet te ishte perleshur me grushta po te ishte burre se burrat e vertete me sa po shikoj une vleresohen nga grushtat dhe organet seksuale.Persa i perket humbjes dhe fitores varet se nga cila pike referimi i shikon .

Keshtu dhe mund te diskutojme per temen. Personalisht nuk kam qene ne Shqiperi, por mendova se ato qe thote M.Nano ishin te bazuara ne fakte.

Citim:

---

Po citoj ato që tha varka
...por dihet boterisht qe ai pas disa ditesh u shkarkua me urdher te berishes.

---

Hajt jete te gjate burracakut Berisha ne politike per te miren Mustafes se keshtu sdo e shohim me emigrant ne pune krahu ne Napoli sepse se ka edhe moshen....

 

Citim:

---

Po citoj ato që tha varka
Ti artum je vetem nje vegel qore je nje gur shahu

---

Citim:

---

Po citoj ato që tha varka  
Paulin sterkaj ka qene drejtusi i operacionit ku u rrahen perkrahesit e ps ne sheshin skenderbej ne tirane 27 maj 1996.M e urdher te tij eshte bere masakra e pleqve perballe pallatit te kultures.Asnjehere su mesua perse ai e dha ate urdher por dihet boterisht qe ai pas disa ditesh u shkarkua me urdher te berishes.

---

Eshte e vertete se Muci ka qene teper i ashper edhe me F Nanon.Kete e kam verejtur ne disa konferenca shtypi te Tosit kur ishte primer.Tosi ka replikuar me te sikur te ishte ne pub jo ne foltoren e konferencave te shtypit.
Mendoj se Muci e ka teperuar ca me ato qe thote.Ne ato dite mars-prilli 1997 S Berisha qendroi ne Tirane dhe nuk udhetonte per ne presidence me autoblinde.Cfare kerkon Mustafai qe Berisha te dale rrugeve te Tiranes,pa asnje mbrojtje.Do t'ju kujtoja nje zonje te nderuar nga Suedia,ministren e jashteme Anna Lin.Nje here shkoi ne nje dyqan e pashoqeruar nga rojat e saj dhe u godit me thika nga nje serb duke gjetur vdekjen. Nuk eshte burracakeri te te shoqerojne rojat,duke qene lider i nje partie dhe drejtuesi kryesor i qeverise..Muci ja fut kot.
Nuk mund ta krahasosh nivelin intelektual te Berishes me trapa te till si Sterkaj,apo T Dedja.Perdorimi i forces eshte mungese arsyeje.
Saliu nuk eshte ngrites peshash,mundes apo karateist.
Simbas mendimit tim burracakeria eshte e lidhur ngushtesisht me friken.
Nuk e mendoj qe "maloket" jane frikacake e sidomos po te jete myslyman.
Mund t'i akuzosh per dicka tjeter me te drejte,por jo per burracakeri.
Artumi vertet Sollaku eshte drejtues i nje institucioni te pavarur,por dihet se drejtesia ne shqiperi eshte ajo pjese e shtetit qe nuk jep drejtesi por vetem padrejtesi.As populli nuk ka besim,por edhe bota i ka drejtuar kritikat me te fuqishme drejtesise shqiptare.Ne drejtesi nuk eshte bere asnje reforme.Edhe kur tentohet te behet nje president qe te jep pershtypjen e nje trungu me miza,behet pengese per nje reforme te domosdoshme.Ka qene i ngrohur edhe ai nga paret e Albatrosit si duket.
Nuk e di pse i ka hyre frika ne palce Mucit dhe si pasoje e kesaj ai bene sulme te paprincipta e te pabesueshme.Ne kohet e fundit shihet nje mbeshtetje e tij per Edvin Ramen.Kete e ka treguar ne disa biseda ne televizion te zhvilluara tani gjate zgjedhjeve.
Une e vleresoj si nje gazetar kurajoz,por te shohim se ku do t'i dal tymi nje akuze te tille qe nuk e beson askush.

Citim:

---

Po citoj ato që tha IQVLORA

Nuk e mendoj qe "maloket" jane frikacake e sidomos po te jete myslyman.

---

Iqvlora myslymanlleku sbesoj se ka ndikim ne trimerine apo friken e shqiptareve sidomos malesoreve.Merr shembull shkodranet te cilet jane ne shumice katolike po trimeria sju mungon nejse shkrimi qe na ka sjelle guri i shahut ketu per te goditur sali berishen me duket se beri te kunderten ne vend qe te flitet per friken po flitet per trimerine.Persa i perket mustafait eshte koke e kembe i majte dhe ben lojen e edi rames .Dhe jo vetem mustafai por edhe shume ANAListe dhe televizione gjoja te pavarura jane hedhur hapur kunder berishes .Te mos harrojme top chanel i cili eshte kthyer ne nje arme te ps.Kohet e fundit nje sy i vemendshem mund te kostatoje se asnje nga figurat e shquara te pd nuk merr pjese dhe ka bojkotuar kete televizion qe eshte kthyer si dikur rtsh.Po te vesh re vetem te majtet bejne biseda politike ne te ashtuquajturat top story dhe shqip.Vetem edi rama ka dale nja 10 here brenda ketij viti.Bazuar ne trillimet mendoj se ky shkrim eshte nga me te dobtit qe mund te kete bere ndonjehere mustafa nano.Aty dallohet qarte inate personale te cilat mundohen te perci lllen ne penen e nje analiste i cili harron qe nqs deshiron te sillesh se paktu si analist duhet te jesh i zhveshur nga shume emocione njerezore.

ps Te mos harrojme kete forum ,drejtuesit,adminet,administratoret ,anetaret ,te gjithe simpatizante te se majtes KOECIDENCE??????

IQ

Citim:

---

Po citoj ato që tha IQVLORA
Artumi vertet Sollaku eshte drejtues i nje institucioni te pavarur,por dihet se drejtesia ne shqiperi eshte ajo pjese e shtetit qe nuk jep drejtesi por vetem padrejtesi.As populli nuk ka besim,por edhe bota i ka drejtuar kritikat me te fuqishme drejtesise shqiptare.Ne drejtesi nuk eshte bere asnje reforme.Edhe kur tentohet te behet nje president qe te jep pershtypjen e nje trungu me miza,behet pengese per nje reforme te domosdoshme.Ka qene i ngrohur edhe ai nga paret e Albatrosit si duket.

---

Citim:

---

Po citoj ato që tha Fajtori  
Megjithate po te kujtoj dhe njehere cfare me tha nje vajze qe punon ne zonat malore te Fierzes dhe Kukesit: "Koncepti i besimit ka lindur nga pabesia". Dhe ne fakt pritat dikur ziheshin nga te pabeset, se trimat dalin ne shesh te burrave.

---

Citim:

---

Po citoj ato që tha varka

ps Te mos harrojme kete forum ,drejtuesit,adminet,administratoret ,anetaret ,te gjithe simpatizante te se majtes KOECIDENCE??????

---

Bledumi

Po c'ke ore me Varken e shkrete, ai edhe Ngjelen rrezik e ka quajtur komunist kur doli kunder Sales. Teknikisht quhet "larje e trurit".

C'na ka gjet me gjoja-demokratet e PD-se. Ka ardhur puna qe edhe kritikat duhet te jene te balancuara se ndryshe te marrin per te njeanshem. Top Channel goditi Fatos Nanon dhe nuk u konsiderua i djathte. Mjafti goditi Nanon dhe u keqinterpretua dhe u shfrytezua nga berishianet. Tani qe Nano iku dhe kritikat bien koke e kembe tek homologu i tij (politikisht i tejkaluar) qenka bere i majte topi. Pastaj jane bere te majte dhe analistet. Me siguri dhe keto i organizon Ramiz Alia. Madje jane skenaret e 1991 edhe krijimi i Top Channel. Po kur mungojne analistet e mire pse nuk shkon ti Varka? Ti qenke me i paanashmi.

Forumi ishte i mbytur nga simpatizantet e PD-se gjate zgjedhjeve. Pas zgjedhjeve nje pjese e tyre (si vete anetaret jo-servile te PD-se) dolen te pakenaqur dhe i vune fajet Berishes. Kjo mesa duket nuk te pelqeka Varka dhe ke filluar konsiderimet alla-PPSH ndaj "armiqve te popullit" qe kritikojne Berishen.

Atehere po te jap leksion demokracie duke e shprehur hapur mungesen e modestise time ne kete rast.

Fakti qe ka kritika ndaj nje politikani nuk dmth se po hidhet ne ere shteti, nuk po luftohen institucionet. Perkundrazi, tregon se ne politike ka fermentim dhe kjo (per periudhen qe jemi) eshte faktor zhvillimi. Ti nuk mund ti mbyllesh gojen njerezve duke i akuzuar si te majte, komuniste apo te kuq. Nuk jemi ne SHBA ketu me keto forma diktatoriale te manipulimit te njerezve. Nga ana tjeter Berishen (te pakten personalisht) e kam mbrojtur si kryeminister qe diten e pare te tij. E dime te gjithe qe Berisha eshte fitues i zgjedhjeve te 3 Korrikut dhe ka plotesisht te drejten institucionale te jete kryeminister. Askush nuk ve ne dyshim te drejten e tij per qeverisje, pra institucionin shteteror, gje qe sidoqofte eshte arritje pas skandalit politik te 1997 kur presidenti u rizgjodh me "shumice votash" gjate gjendjes se jashtezakonshme. Eshte arritje e madhe qe nje popull i traumatizuar te rivendose me shumice (relative) votash te njejtin njeri dhe te respektoje detyren e tij deri ne fund. E megjithate ju nuk po i lini njerezit as te shprehin opinionet e tyre politike pas zgjedhjeve. Madje pretendohet qe kritikat te jene sa me te balancuara ndaj Berishes dhe PD-se. Ne te kundert te gjithe konsiderohen te majte. Po ku jane keta te majte se kuptoj? Te dukem gje i majte une ty? Eshte i majte IQvlora? Eshte e majte Agata?

Varka, hidhi njehere syte rrotull dhe mendo cfare eshte e djathta. Te duket i djathte ty kulti personal Berisha qe po ben legalizimet duke "falur" tokat e tjeterkujt? Apo kujton se e djathta duket vetem ne ato 3 taksa qe teorikisht duhet te jene ulur.

Ngado qe ta marresh Berisha eshte politikisht i mbaruar dhe PD do rinovohet heret a vone me personazhe te rinj. Dhe atehere ndoshta e djathta behet tamam e djathte duke respektuar pronen me shume sesa bathoren. E ndoshta keshtu njerezit do gjejne partine qe prisnin ne panoramen politike.

Megjithate nuk e ve doren ne zjarr sepse Berisha dukej i mbaruar edhe ne 1997, por fale personazheve si puna e Varkes plluskoi prape ne skene dhe ne kryeministri. Dhe kjo nuk do te thote qe po sulmohen institucionet. Berisha eshte nje njeri dhe jo institucion. Megjithese... ca flas dhe une kot. 16 vjet ne parti dhe 7 vjet ne pushtet, me keto mend o Varka per ty institucion eshte. Madje njesh, me i miri, me i bukri, me shpatullgjeri, me trimi.

P.s. Jam dakort qe M. Nano nuk eshte ne nivelin e tij ne ate shkrim.

Varka, ki parasysh qe dy mesazhet para timit nuk munda ti lexoj nderkohe qe shkruaja. Cdo ngjashmeri eshte nje rastesi qe duhet te te beje te mendosh.

Une testin e bera dhe do pres dhe pak...

Nje shtojce te vogel. PD po te ishte e djathte nuk do merrte me shume se 10% te votave. Eshte parti e qendres se djathte. Po ajo qe beri me pronat e kaloi tek extremi i majte. As PS nuk i lejohej te bente nje gje te tille.

Lexoje edhe kete o Varka dhe mbase na jep ndonje pergjigje (ta kam bere edhe me blu qe ta lexosh me me kenaqesi):

 

 
Negociata xhambazësh dhe qeveria "Berisha 2"

Mustafa Nano
Ka disa gjëra që nuk shkojnë në reagimin e mazhorancës parlamentare ndaj rezultatit të zgjedhjeve të 18 shkurtit. Ndonëse numri një i kësaj mazhorance shpalli me të madhe fitoren e vet plebishitare, duke lënë syshqyer të gjithë shqiptarët, është ai i pari që po sillet si një humbës e që po kërkon të ndëshkojë fajtorët. Kjo duket te fakti që Kryeministri ka filluar një tour bisedimesh me aleatët, pas të cilave pritet të dalë qeveria "Berisha 2". Me sa duket, qeveria "Berisha 1" konsiderohet edhe nga brenda mazhorancës si një qeveri e dështuar. Dhe askush nuk ka pse të çuditet në këtë pikë. Çudia ka lidhje me diçka tjetër: konsiderohet e dështuar qeveria e nuk konsiderohet i dështuar Kryeministri, i cili i ka vënë vulën e vet të gjithë aksionit qeverisës. Në harkun e 500 ditëve të shkuara, qeveria ka pasur vetëm një protagonist, dhe ky protagonist e ka emrin Sali Berisha. Ka qenë ky i fundit që ka iniciuar kinse reforma, që ka shpallur nisma qeveritare e nisma ligjvënëse, që ka përfaqësuar çdo hallkë e strukturë të ekzekutivit, që ka përuruar vepra publike të nisura e të panisura, që ka mbajtur fjalime pa fund e që ka lënë në hije apo ka shtypur çdo personalitet të mazhorancës e të pushtetit. Madje, është po ky që s‘ka lënë rast (sidomos gjatë fushatës elektorale) pa na bërë me dije mbi sukseset e qeverisë së drejtuar prej tij.

Pyetja e parë është: Pse u dashka të ndërrohet një qeveri pas zgjedhjesh administrative, në të cilat "është konfirmuar mbështetja plebishitare ndaj po kësaj qeverie"? Në tentativën për t‘iu përgjigjur kësaj pyetjeje, mund të na thonë se "fitorja plebishitare" ka qenë një rrenë e thjeshtë propagandistike, që s‘ka pasur të bëjë fare me të vërtetën. Dhe e vërteta është që mazhoranca ka humbur. Por këtu lind pyetja e dytë: Ç‘janë këta ministra, të cilët Kryeministri i emëron dhe i shkarkon pa një, pa dy, duke i bërë kurban në funksion të mbijetesës së vet? Si është e mundur, që këta njerëz e presin me gëzim si emërimin, edhe shkarkimin nga posti i ministrit (Jemin Gjana u dëgjua të thotë pak a shumë këto ditë, se është e drejta e Kryeministrit të bëjë ç‘të dojë me ne)? Si është e mundur që një kryeministër mund t‘i turpërojë deri në këtë farë feje këta njerëz? Si është e mundur që nuk ngrihet asnjë zë brenda mazhorancës, i cili të marrë kurajën për të theksuar, se dështimi i deritanishëm ngrihet mbi faktin, që ne kemi pasur kryeministër, alias padron, e nuk kemi pasur asnjëherë një qeveri? Si nuk ngrihet asnjë zë kundërshtues, teksa shohin se i gjithë aksioni i rikompozimit të kabinetit nuk synon ta zhbëjë këtë situatë, në të cilën ministrat do të vijojnë të jenë thjeshtra e gogla pa vlerë?

O guri ndonje ide tenden personale do te sjellesh ketu se po me duket vetja si ne debat me mustafa nanon. Keshtu qe here tjeter perpara se te kerkosh pergjigje bej ndonje pyetje ......Megjithate populli ka nje fjale te urte "sipas kokes dhe festen" keshtu qe ja ku e ke dhe pergjigjen:


Partia Demokratike dhe aleatët e saj kanë thelluar në mënyrë të ndjeshme avantazhin në rezultatin e zgjedhjeve vendore të 18 shkurtit krahasuar me koalicionin e majtë. Të dhënat zyrtare të institucionit qendror të administrimit të zgjedhjeve tregojnë se koalicioni qeverisës ka fituar 65% të njësive të qeverisjes vendore nga 32% që ka fituar koalicioni i majtë. Nënkryetarja e Partisë Demokratike, Jozefina Topalli, duke paraqitur këto shifra e cilësoi fitoren e koalicionit të djathtë të shtrirë në të gjithë territorin e vendit. "Është një fitore demografike, ku vihet re një shtrirje e ngjyrës blu në këto zgjedhje lokale", vlerësoi Topalli gjatë një konference për shtyp në selinë e Partisë Demokratike. Duke iu referuar rezultateve përfundimtare të publikuara nga Komisioni Qendror i Zgjedhjeve për 360 njësi të qeverisjes vendore, Topalli theksoi se Partia Demokratike ka fituar në 10 qarqe nga vetëm dy të tilla që ka fituar e majta, ose pesë herë më tepër. Më tej ajo theksoi se, për 235 njësi të qeverisjes vendore, ndërsa koalicioni i majtë vetëm 115 njësi. "PD dhe koalicioni i djathtë ka fituar në 235 njësi, ndërsa ai i majtë vetëm në 115. Me përqindje 65% i takon koalicionit të djathtë dhe 32% koalicionit të majtë, ose120 njësi më shumë atij të djathtë", u shpreh Topalli. Ndërsa, duke u ndalur në rezultatet për mazhoritarin, ajo theksoi se koalicioni i djathtë ka fituar 53% të votave, ndërsa koalicioni i majtë 47 përqind, duke nënvizuar se partitë e djathta qëndrojnë 6 përqind më tepër se koalicioni i majtë ose i lexuar me vota, 60 mijë vota në avantazh të koalicionit të djathtë. Ndërsa, duke u ndalur në rezultatet e proporcionalit, nënkryetarja e Partisë Demokratike theksoi se, edhe në këtë aspekt koalicioni i djathtë kryeson në mënyrë të ndjeshme me më shumë se 120 mijë vota. "Partia Demokratike dhe koalicioni i djathtë ka fituar 53 përqind, në krahasim me 43 përqind që ka fituar ai i majtë, ose me përqindje 10 përqind më shumë ai i majtë. I përkthyer ndryshe, 120 mijë vota më shumë koalicioni i djathtë nga ai i majtë", deklaroi Topalli. Ajo saktësoi se, Partia Demokratike dhe koalicioni i djathtë kanë fituar gjithashtu edhe përsa i përket numrit të këshilltarëve. "PD dhe koalicioni i djathtë ka fituar 741 këshilltarë, në krahasim me 584 që ka ai i majtë, ose i lexuar me përqindje 53 përqind ai i djathtë, me 42 përqind të së majtës. Pra, janë 160 këshilltarë të djathtë më shumë se ata të majtë. Në përqindje, është mbi 11% në avantazh koalicioni i djathtë nga ai i majtë", nënvizoi Topalli.

Fajtori po te jap nje statistike per ngjarjet e '97-s.Ne qytetin e Vlores u vrane disa dhjetra djem (dhe nje nene duke i dhene gjoks femijes ne oborrin e shtepise se saj) te fese myslimane dhe gjithsejt tre kaur,megjithese jane gati 60 me 40 ne perqindje.
Historikisht ne Vlore vrasjet mbas shpine ose ne pusi nuk behen, por balleperballe.Edhe me 1997 vrasjet jane bere balleperballe.Ate pohimin e asaj vajzes e kam degjuar edhe une,but depend.Mund te jete budallallek,por ne i dalim armikut ballazi,ndersa dikush tjeter i bene dredha.Ne nuk jemi dredharak.Keto cilesi i kam te thena nga te vjetrit,por dhe te jetuara vete.Analizoni si te doni.Trima me llafe ka plot ketu ne internet.Po qe njeri qe nuk ja vlen qe te ballafaqohesh,ne te abandonojme.
Po te hidhemi tek tema.Per mua qofsh kush te duash,i majte apo i djathte nuk ka rendesi.Derisa une nuk jam i perjshtuar te shpreh mendimin tim per nje problem ne nje debat te caktuar, cdo gje eshte normale.Mendoj se FH eshte ne nje ecuri normale,sepse dikur o miku im varka ketu ishte si ne vitin 1985.Ishte nje lukuni moderatoresh e provokatoresh qe te kujtonin celulat e SIG te shtetit do t'i quaja.Por ''primer minister''beri nje reforme teper rezultative.As qe me bene pershtypje se shumica jane te majte dhe te tille jane.Eshte detyre e tyre qe edhe mizen ta bejne buall,sepse kane humbur dy here rresht ne harkun kohor te 18 muajve.Ne duhet te pranojme se ata nuk fituan sasi,por cilesi.Ata sipas kutit te tyre e quajne fitore.Edhe ne po te ishim ne vendin e tyre keshtu do ta konsideronim.
Fajtori PS & Nano ishin bere ne ate moment qe e kritikoi TOPCHANEL si burri i nenes(stepfather) per shqiptaret,ndersa tani eshte vene kryekeput ne sherbim te Edvinit.Kam shkruar edhe me pare por menyren se si i transmetonte lajmin gjat fushates. Ishte gjithmone e njeaneshme,ne disa raste edhe duke e censuruar.
Per ti dale ne ndihme Edvinit e quajti ardhjen e Doris Pack si mbeshtetje per Berishen duke e shoqeruar me disa komente teper bajate.
Topi eshte nje medja private,sulmoi Berishen do ta largojne nga Piramida.Tani drejtuesit e saj jane hedhur ne sulem te eger kunder Berishes.Sido qe eshte doktori me te metat dhe te mirat e tij,cdo Tv do ta kish per nder qe te ftuar te kish kryeministrin e vendit.Saliu nuk ua jep ate kenaqesi atyre.Der dje kur PS ish ne pushtet Klani e kish mire me Nanon.Nje kritike i beri Klani atij dhe ai e abandonoi ate,ndersa Klani si media e shikuar nga shumica e shqiptareve ju kthye atij me te gjitha baterite.Keshtu i kemi ne mediat te politizuara.
Artumi si e quani ju caktimin e bodiguardit nga Lesi per minister shendetesie?Akti i djegjes se Kohes me 1997 ishte nje krim,por duhet te dini se ne ato dite ajo gazete dizinformoi popullin me lajme te rreme.Ajo u be zedhenese e bandes se Zan Caushit.Ajo gazete e beri ate mut-muti sikur me qene Osama bin Laden sot.Ai dhe evgjito-gabelet e tij te udhehequr nga PS nuk kontrollonin as 1/5 e qytetit.Lesi dhe Koha kane ndihmuar ne djegjen e Shqiperise ne ate kohe.E kam lexuar rregullisht Kohen atehere,sepse vetem ajo dhe pacavurja,kurva ZP futeshin ne Vlore.
Skandalizohesha me mashtrimet qe shkruheshin nga gazetarja Zenepe (bitch) e paguar nga banda kriminale.Ajo gazete ju kalli daten popullit edhe ne Tirane me Z C.Krimineli u grind me nje djale te lagjes 1 Maji (lagje ngjitur me Colen) dhe i dergoi gabelet nen shoqerimin e shoferit te PS per Vloren te quajtur Vilson dhe vellait te tij Balilit.I vetem djaloshi edhe ky nje kriminel,vrau Vilsonin,nje gabel dhe plagosi ne kembe Balilin.Ndersa Gazeta e Lesit tha te kunderten.Me nje fjale gazeta e Lesit iu bashkua mediave nderkombetare per t'i vene flaken Shqiperise.Mire te huajt,po nje gazete shqiptare ku e conte mushka.Per meritat ne djegjen e vendit cifuti Sorros i akordoi nje grand prej 200 mij dollaresh Lesit.
Po bashkpunimin e Lesit me ''armikun'' Berisha si e quani ju artum dhe Fajtori?Berisha i beri nje nder te madh lehesit Lesi.Ai e shpetoi nga burgu ku Nano nepermjet vegles Sallaku do ta kish kredhur brenda.Pra me Saliun ai eshte i lare dhe bene mire ta qepi bucen.Nuk e mora vesh se cila gazete e ka botuar ate artikull.Ndofta prostituta 65 vjecare.
Per mendimin tim PD duhet te ndjeki shembullin e P Laburiste qe i tha Blair-it largohu mos na u beje pengese qe te fitojme perseri me 2009.Edhe PD duhet t'i thote doktorit ju lutem largohu ne nje moment te pershtatshem e mos na pengo sepse me ty nuk fitojme me.Deri me 2009 fshati do t'i harroj koqet e zbuluara te edvinit.
PS: PD & aleatet jane fitues.

......... E ME GJITHATE...... KOHA DO TA TREGOJE.. SE SA I REDESISHEM I SHTE SALA....por nje gje ai eshte futur ne historin e...shqiperis.. me pozitiv nga nano...une nuk jam i dhathte..ahhaaaaaa

IQ

1) Artikullin e ka shkruar Lesi tek gazeta e vet (nuk e lexoj asnjehere ZP dhe PD)

2) Pavaresisht nga ato qe thua per Kohen ne '97, ma merr mendja se je dakord me mua qe nqs nje organ cfaredo shtypi ne "kushtet" per te cilat fole MBYLLET, nuk digjet.

3) Nuk gjykoj strategjite politike te Lesit, (ne fund te fundit politika eshte kurve thuhet nga anet tona) por mendoj qe, NE KUSHTET AKTUALE qe ndodhet politikisht zoti Lesi mund te evitonte ta bente kete shkrim, ose me mire para se ta shkruante, tu kerkonte te gjithe personave te barbarizuar qe permend ne artikull a ja kane falur Sales ata kete ndodhi apo jo (duke pare qe vete Lesi e ka falur).

4) Ate historine e Blair-it thuaja Varkes jo mua. 

Re: IQ

Citim:

---

Po citoj ato që tha arturm
nje organ cfaredo shtypi ne "kushtet" per te cilat fole MBYLLET, nuk digjet.

---

O Varka, mire zonja Topalli qe per zanat duhet te beje ate qe ben po ti nuk arrin te gjykosh me mendjen tende? Po s’ka ndikuar fare ajo Kanadaja tek ty ore i uruar? Po pse ore njelloj eshte nje kryetar/keshilltar komune ne Zallbastar me ate ne Tirane? Pse e ka zyren ne Tirane Sala dhe nuk e ka ne Kashar? Zgjedhjet jane nje mekanizem sa i thjeshte aq edhe i komplikuar, shpresoj qe ta kesh kuptuar qe p.sh. nuk zgjidhen ne zonen e Dushkut 17 deputete por zgjedhjet ne ate zone percaktuan 17 deputete.  Ne politike jo gjithmone 2+2 bejne 4. 
  
Nje shembull: 

Shko ne faqen e KQZ dhe shif rezultatet e 2005:
http://www.cec.org.al/2004/Zgjedhej...ang%20vendi.pdf
 
E DJATHTA PARLAMENTARE (ne perqindje)
 
PD             7.67
PR            19.96
PDR           7.42
PBDNJ       4.13
PDK           3.26
BLD           1.06
 
 TOTAL     43.5 
  

E MAJTA PARLAMENTARE (ne perqindje)
 
PS               8.89 %
PSD           12.74
LSI              8.40
PAA            6.56
AD              4.76
PDSSH       4.25
 

TOTAL       45.6

Sipas llogjikes se zonjes Topalli, duke pare keto rezultate te 2005 Sala nuk duhet te jete legjitimisht Kryeminister i Shqiperise sepse ne popull e majta ka marre me shume vota se e djathta?

 

P.s. Megjithate e mbyllim ketu muhabetin. 

O guri po leri shifrat se ngaterohesh he te keqen xhaxhi varka.Iqvlora tha nje llaf mend qe pd fitoi shumicen por ps fitoi cilesine .Ne keto zgjedhje faktori dushk nuk ishte i pranishem keshtu qe ai krahasimi qe na dhe me lart nuk eshte me vend po megjithate une po ta marr te mireqene dhe po te them qe ti prape gabon se ti harron qe ato votat 6.56 votat e paa sjane me tek e majta keshtu qe 43.5+6.56 e djathta shkon 49.61 kurse e majta45.6-6.56=39.04 keshtu ti si djale me shkolle qe je e ben vete llogarine se kujt i takon te qeverise por nejse....

E mbyllim Varka se une s'do zbraz timen per te mbushur tenden.

1- Batuten e Dushkut se paske kuptuar  (pikerisht sepse nuk hyn Dushku ne keto zgjedhje nuk nuk mund te te pretendohet se, "megjithate", u fitua ne proporcional). Te gjithe e dine, pervec Berishes, Topallit dhe ty, se zgjedhjet vendore jane cilesore dhe jo sasiore. Ka shume te djathte qe, per vete specifiken e zgjedhjeve vendore, mund t'ja japin Rames voten per Kryetar Bashkie por nuk do ja jepnin kurre voten PS (ne nivel nacional). E njejta mund te ndodhe me elektoratin e majte.

2 - Persa i perket PAA konfirmon tezen time qe nuk perdoret matematika e thjeshte ne keto raste, por nejse. Me 3 Korrik Berisha formonte qeverine ME ose PA xhuvelin (te thashe pavaresisht nga rezultati ne perqindje dhe kjo ka te beje me sistemin zgjedhor maxh+prop). Xhuvelin e morri per te arritur votat per presidentin dhe jo per qeverine, por nejse. 

Ok, une thashe timen, ti tenden, mendoj se u sqaruam per kete teme.

Psh.

P.s. Ah se harrova, nick-u im eshte Arturm dhe jo Guri (edhe ne te folur do imitosh Berishen o i uruar?). 

Ore dini gje per ushtaret grek qe duan ti bejne zorret tona(dmth te ne shqiptarve)lidhese kepucesh dhe litare apo............zgjedhjet iken dhe do vine te tjera keshtu qe ju kot grindeni ,sa i ngrini nervat njeri-tjetrit.

misteriozo

shtyp Tema Tjeter e do arrish

Citim:

---

Po citoj ato që tha misterioz
Ore dini gje per ushtaret grek qe duan ti bejne zorret tona(dmth te ne shqiptarve)lidhese kepucesh dhe litare apo............zgjedhjet iken dhe do vine te tjera keshtu qe ju kot grindeni ,sa i ngrini nervat njeri-tjetrit.

---