GENTI_the_KING
MBRET I PERJETSHEM
Regjistruar: 08/09/2004
Vendbanimi: Ne Keshtjellen Time Te Pamposhtur
Mesazhe: 2683
|
TIRANA FITON SUPERKUPEN 2006 NDAJ ELBASANIT
Bardheblutë mposhtin ekipin kampion, duke dhënë shenjën e parë të dominimit këtë sezon
20-08-2006
Tirana, superkupa e "hakmarrjes"
TIRANA - ELBASANI - 2 - 0
Shënues: Salihi 24', Muka 60'
Elbasani: Kotorri, Memetaj, Stojku, Kacollja, G.Bylykbashi, Kuçi, E.Dalipi, Kaçi, Muja (Ceno 66'), Stojanov, Çapja (Akamba 78'). Trajner: L.Deliu.
Tirana: Nallbani, Abraham (Hajdari 80'), Dede, Pisha, Allmuça, Bulku, Sinani (Sina 68'), Muka, Salihi, Patushi (Fish 72'), K.Duro. Trajner: M.Josa.
Gjyqtarë: T.Latifi (Gjirokastër), E.Miho (Durrës), A.Pregja (Tiranë)
"Radiografia"
1' Sinani kroson nga e djathta për Salihin, që godet rrafsh me tokën, por jashtë kuadratit të portës.
7' Sinani triblon disa futbollistë në zonë dhe gjuan në ecje e sipër, por topi kalon pranë shtyllës së djathtë pingule.
18' Çapja ekzekuton një goditje dënimi nga mesfusha, topi shkon zonë për Stojkun, që shkëputet bukur me kokë, por topi del jashtë kuadratit.
19' Kombinim i bukur mes Allmuçës dhe Sinanit, që fut një top të rrezikshëm në zonë, por nuk shfrytëzohet nga futbollistët e tjerë.
24' Muka depërton nga e majta e sulmit të Tiranës, pason saktë në formë krosi për Salihin, që i vetëm përballë portierit Kotorri shënjestron në këndin e djathtë të tij, duke shënuar golin e parë për Tiranën.
26' Muka futet bukur në zonën e Elbasanit, pasi triblon 2 mbrojtës, gjuan fort, por grushton portieri Kotorri.
27' Goditje këndi për Elbasanin, që ekzekutohet nga Kaçi. Topi kalon në drejtim të Kacollës, që shënjestron me kokë, por grushton portieri Nallbani.
31' Çapja gjuan në ecje e sipër nga 18 metra, por jashtë kuadratit të portës.
35' Muka vallëzon brenda zonës së Elbasanit, duke shmangur 3 mbrojtës, gjuan, por Kotorri nuk mposhtet.
38' Momenti më i mirë për ekipin e Elbasanit. Kuçi pengohet në vijën e zonës së rreptësisë dhe gjyqtari akordon një goditje, që ekzekutohet nga Stojku, i cili e kalon topin ngjitur me shtyllën transversale.
56' Elbasani pretendon për një 11 metërsh pas një prekje të topit në zonë nga Abraham, por gjyqtari e ka gjykuar këtë rast si të pavullnetshëm dhe ka vijuar lojën.
60' K.Duro futet bukur në zonë dhe pason për Salihin, që pasi sheh të zbuluar Mukën, jep një asist për të. Kapiteni i Tiranës nuk e ka të vështirë që të shënojë përballë portierit Kotorri, që mposhtet për të dytën herë.
64' Gabim i mbrojtjes së Tiranës dhe Kaçi kërkon të shënojë, duke parë edhe daljen e gabuar të Nallbanit, por ky i fundit korrigjon duke e pritur me vështirësi topin.
68' Patushi shënon për Tiranën pas një lëmshi në zonë, por gjyqtari ka parë një pozicion jashtë loje.
80' K.Duro shmang me sprint të gjithë mbrojtjen e Elbasanit, por krosi i tij nuk arrin të shfrytëzohet nga sulmuesit.
Komenti
Fituesja e Kupës së Shqipërisë ka fituar edhe superkupën, pasi ka mposhtur në stadiumin "Niko Dovana" ekipin e Elbasanit me rezultatin 2 0. Një ndeshje pa shumë histori, ku një Tiranë e kompletuar dhe me një grup në vazhdimësi ka mposhtur një Elbasan të improvizuar, që as trajneri Deliu nuk e njihte mirë. Tifozëritë e ardhura nga Elbasani dhe nga Tirana kanë mbushur dy krahët e tribunës, duke përkrahur ekipet e tyre, por edhe duke shprehur rivalitetin e njohur që ka mes dy ekipeve dhe tifozërive. Pas një fillimi të ekuilibruar të takimit, ekipi i Tiranës ka marrë gradualisht frenat e lojës në dorë, duke qarkulluar topin dhe duke rrezikuar me dyshen Muka Salihi, në një kohë që Elbasani është përpjekur që të reagojë me sulmuesin e sapoardhur nga Kosova, Mujën, pa harruar edhe Çapjen. Pas disa rasteve të Sinanit, Salihit dhe Mukës, do të jetë Salihi që ka shfrytëzuar një mundësi të mirë që i ka dhënë Muka, duke goditur saktë me kokë përballë portierit Kotorri. Elbasani është përpjekur që të reagojë pas këtij goli, por pa arritur të gjejë rrugën e golit. Në minutën e 38 të, Stojku për pak nuk barazpeshon rezultatin, por topi ka kaluar pak cm larg shtyllës transversale. Pjesa e dytë ka pasur një protagonist, Tiranën, që tregon se është më superiore, por edhe se ka një kondicion fizik më të mirë se Elbasani. Pas disa rastesh shënimi, më i miri në fushë për bardhëeblutë, Devi Muka, ka shënuar edhe golin e dytë të takimit, duke i dhënë fund historisë së superkupës. Tirana mund të shënonte edhe golin e tretë, por Kotorri ka treguar se është në lartësinë e detyrës, në një kohë që Elbasani ka pasur pretendim për një 11 metërsh. Tirana ka shënuar në pozicion jashtë loje me Patushin, në një kohë që takimi në 15 minutat e fundit ka qenë vetëm një formalitet. Në një ceremini simbolike në fund të takimit, kapitenit të Tiranës, Devi Muka, dhe ekipit i është dorëzuar superkupa nga zëvendëspresidentët e federatës, në një kohë që ka munguar presidenti Armando Duka. Tirana e ka filluar me trofe sezonin, në një kohë që tashmë po mendon për takimin e kthimit në Turqi për Ligën e Kampioneve. Kampionëve në fuqi të Elbasanit, nën drejtimin e Luan Deliut, nuk iu mbetet gjë tjetër, veçse të punojnë për të ndërtuar një ekip më të konsoliduar, pasi kampionati po afron dhe përsëri Tirana është shumë pranë. Tirana është për të tetën herë fituese e superkupës.
Të veçanta:
Rreth 1200 sportdashës të ardhur nga Tirana dhe Elbasani kanë ndjekur takimin final të superkupës, ku nuk kanë munguar dhe acarimet në mes të dy tifozërive.
Deklarojnë:
Mirel Josa, trajner i Tiranës: "Mendoj se ndeshja u thjeshtua pas shënimit të golit të parë. Elbasani u respektua si një ekip kampion në fuqi. Mendoj se kemi shumë punë për të bërë. Jam i kënaqur me dy futbollistë, si Abraham dhe Nevil Dede, që si profesionistë u ambientuan shpejt me ekipin, por mendoj se duhet të bëjmë shumë në drejtim të disiplinës taktike. Nuk mund të them se vetëm superkupa është një fillim i mbarë, pasi fillimin e mbarë duhet që ta bëjmë që në kampionat. Tani kemi para takimin e kthimit në Turqi për kupën e kampioneve, ku do të shkojmë për fitore."
Luan Deliu, trajner i Elbasanit: "Ekipi me të cilin luajtëm sot ishte i improvizuar. Një pjesë e mirë e ekipit tim, që nuk është ambientuar akoma, në një kohë që kemi pasur dhe futbollistë që i futëm në pozicione ku nuk kanë luajtur ndonjëherë (mbrojtës krahu). Kemi edhe futbollistë që nuk kanë përgatitjen e duhur fizike. Në ditët në vijim presim që të përforcohemi edhe me disa futbollistë të tjerë, që mund t'i marrim brenda kampionatit shqiptar të futbollit, por edhe jashtë vendit."
marre nga Sporti Shqiptar
__________________
Ti SHQIPERI , me jep nder , me jep emrin SHQIPETAR.
Denonco këtë mesazh tek moderatorët | IP: e regjistruar
|
29 Maj 2006 16:45
Forumi Horizont > Sporti > Futboll > Kampionati Shqiptar > Superliga 2006 -2007
