astras
larguar
Regjistruar: 14/02/2006
Vendbanimi: x
Mesazhe: 214
|
Pink Floyd
Grupi Pink Floyd u krijua rreth vitit 1965 në Londër nga dy iniciatorët Syd Barret dhe Roger Waters – ide që i lindi gjatë studimeve në Kembrixh. Më tej, Waters u regjistrua në një kurs arkitekture ku takoi Nick Mason dhe Rick Right, dhe të katër sëbashku ranë dakort për të formuar një grup muzikor që ata e pagëzuan si Sigma 6, i cili nuk pati sukses. Pas disa përpjekjeve të tjera për të gjetur një emër të përshtatshëm, shkëndija i vjen Barret-it dhe grupi quhet Pink Floyd, sipas dy bluesmen-ëve të shquar, Pink Anderson dhe Floyd Council. Shumë shpejt ata bënë një kontratë për të dhënë shfaqje në Marquee Club në Londër. Muzika e tyre ishte një përzierje që ata e quanin “underground spontan”, me tinguj imagjinarë blues-i, që dilnin nga eksperimentimi me instrumentin për të zbuluar zona të reja, të pashkelura më parë. Në këtë kohë ata futën gjatë shfaqjeve të tyre elemente vizivë elektronike, për t’i dhënë një ngjyrim më mistik performancës. Syd Barret filloi të kompozonte këngë të rralla bazuar mbi një pop psikedelik, të kombinuar me lirika therëse, poetike dhe melodi të zhdërvjellta, në një truall kitare si të pushtuar nga xhindet, e që shpesh hynte në zona hyjnore të një fëmijërie të humbur, të cilën ai e vuante shpirtërisht.
Fëmijëria mbaroi,
Fantazitë humbën në realitetin e vrazhdë.
Grupi inçizoi te EMI një këngë të shkëlqyer “Arnold Layne” në 1967-ën, e cila kapi njëzetë më të mirat në klasifikim. Po në atë vit pason The Piper at the Gates of Dawn që mund të kishte qenë albumi më i mirë psikedelik britanik, sikur Beatles mos të kishin nxjerrë sfidantin Sgt. Peppper’s… Megjithëse titulli i albumit të Pink Floyd është më grishës dhe vizionar, bëhet fjalë për një Fyelltar që ka ardhur në Portat e Agimit të Ditës. Album si ky nuk do të bëhej dot më në të ardhmen e grupit. Këngët ishin kompozuar në pjesën më të madhe nga Barret, ku dominonin terma të tillë si: yjore, astronomike, udhëtime ndëryjore apo gjetje të tjera fantastike – pjellë e mendjes gjeniale të Barret – gjeni që më vonë do të shndërohej në çmenduri, dhe që do të rrezikonte integritetin e grupit. Barret kishte filluar ta mbizotëronte grupin më një dorë të hekurt, por që nuk zgjati shumë – i talentuari filloi të shfaqte shenjat e para të çrregullimit mendor, kjo dhe për shkak të përdorimit të LSD. Për të kishte ardhur koha e largimit, dhe grupi u ndodh përpara një dileme se kush do ta zëvendësonte atë.
Rrotull 1968-ës ata rekrutuan Dave Gilmour, një mik i vjetër që nga koha e Kembrixhit. Kohë të vështira po vinin rrotull Pink Floyd sepse Barret ishte “të gjitha, në një”. Shumë grupe janë shpërbërë në situata të tilla, por Pink Floyd i gjetën forcat për të dalë sipër. Gilmour më aftësi të jashtëzakonshme në kitarë, dhe Waters me dhunti kompozimi, filluan të bëhen protagonistë, që paraprinë daljen e disa albumeve të mëvonshme. Gjatë katër viteve që pasuan ata e përkryen portretin e tyre të Rock-ut eksperimental, duke martuar psikedelinë me atmosferën e një lloji zhanri Vagnerjan operistik, me nuanca blues-i, të cilat kapën një audiencë të gjerë. Në këtë kohë dalin albumet Atom Heart Mother dhe Ummagumma, por albumi që i çoi ata si triumfatorë në Amerikë ishte Dark Side of the Moon. Ky album shenjoi një kthesë të madhe në historinë e tyre, me efektet zanore stereofonike, muzikën kozmike, tekste këngësh të frymëzuara, të shoqërura nga saksi dhe vokali koral i ndjeshëm, i femrave në sfond. Në lirikat e Dark Side of the Moon preken tema si frika, pasiguria dhe steriliteti i ftohtë i jetës moderne.
Albumi tjetër Wish You Were Here duket se i zhvillon më tej këto tematika në terma më të zymtë, por më të artikuluar dhe të drejt-për-drejtë. Në album përfshihet dhe kënga e mrekullueshme për një nga themeluesit e grupit, Syd Barret, Shine On You Crazy Diamond. Përtej një kënge albumi, Shine On… është një elegji elokuente e tipit modern Adonais, e denjë për t’u bërë një himn universal, që të çliron ndjenja estetike të një zone qiellore. Tingujt janë pyetës, herë-herë duket sikur lypin ndjesë, pastaj shpërthejnë me fuqinë e vullkanit, pastaj shtrohen dhe rrjedhin ëmbël – është një nga krijimet më të ndjera të Pink Floyd. Në këtë periudhë Waters, me poezinë e lirikave dhe përfytyrimet muzikore, po i jepte një pamje tërheqëse grupit – gjë që u kurorëzua me albumin The Wall në vitin 1979. Obsesioni i tyre, Muri, ishte një mur imagjinar, por shpesh dhe material që njerëzit ngrejnë në mendjet e tyre, si dhe jashtë në botën fizike.
Me çfarë do t’i mbushim hapsirat boshe
Ku dikur ne flisnim?
Si do ta mbarojmë murin?
“Ideja jonë është që ta përhapim tingullin përreth nesh, tek spektatorët, ndërsa ne ndodhemi në mes. Kjo e bën shfaqjen më teatrale – pastaj mund të përfshish melodramë, gjetje letrare, muzikë dhe drita” – thotë Waters.
Stili i tyre i errët vazhdoi të thellohej në kompozime të tjera si Brain Damage, Money dhe Time të cilat tregonin një interes në rritje të grupit për tema fatale të fundit të botës, apo të pjesës së errët njerëzore. Në performancat e tyre ata shpotisnin autoritetin e rremë me anë të figurave groteske dhe efekteve zanore/vizive, të menduara mirë. Shqetësimi i përhershëm i grupit ishin shumë karakteristika dhe gjendje njerëzore, që kishin degraduar, në një mjedis që po bëhet përherë e më shumë armiqësor.
Përveç fuqisë së muzikës që ata krijuan, një nga arritjet më të mëdha të Pink Floyd gjehet në kërkimin e tyre pakompromis për perfeksion. Pas kaosit të erës psikedelike, grupi hapi shtigje të reja cilësore në tinguj dhe performancë. Koncertet dhe shfaqjet në publik ishin produkt i një pune skrupuloze deri në hollësi, që i bënë ata monumentalë. Fama dhe përvoja e Pink Floyd do të ndikonte një brez tjetër që po lindte rreth viteve 70-të si: Yes, Mike Oldfield, Genesis – të cilët vlerësuan mjeshtrinë dhe paraqitjen e tyre, si rrallë grup tjetër.
Disa njerëz vdesin nën qiellin pafund
Do ketë luftë, do ketë paqe.
Por çdo gjë, një ditë do mbarojë.
Tërë hekuri do kthehet në ndryshk;
Dhe njerëzit krenarë në pluhur.
Dhe kështu gjithë gjërat, koha do t’i rregullojë.
__________________
Bye
Denonco këtë mesazh tek moderatorët | IP: e regjistruar
|
07 Mars 2006 05:18
Forumi Horizont > Arti & Kultura > Muzika > Video Muzikore > Pink Floyd
