Vizioner
...ne Timon
Regjistruar: 23/11/2007
Vendbanimi: Frankfurt
Mesazhe: 6857
|
 Zvarrë si kryeministër!
Nga Mero Baze
Sali Berisha nisi dje një proces konsultimi me aleatët e vet në qeveri, për të konsumuar procesin formal të bisedimeve, ndërkohë që dha sinjale të qarta se nuk ka ndërmend të bisedojë për një president konsensual me opozitën. Takimet e tij me LSI, partinë çame dhe atë republikane, në të vërtetë duan të përcjellin mesazhin se ai është duke punuar për një president të shumicës qeverisëse dhe jo për një president konsesual.
Ndërsa në vitin 2002 dhe 2007 bisedimet janë bërë mes Berishës dhe Nanos, e Berishës dhe Ramës, dje Berisha refuzoi qartazi takimin me Edi Ramën për presidentin konsensual. Ky është sinjali më i fortë politik që Berisha ka dhënë kundër gjithë ëndërrimtarëve të presidentit konsensual. Ndaj në këtë pikë nuk besoj se ia vlen më të bëhet debat për ndonjë emër konkret që do të prekë në zemër Berishën për president konsensual, apo për ndonjë presion ndaj tij.
Ajo që Berishës i intereson është të ruajë formalisht koalicionin me LSI deri në fund të procesit të zgjedhjes së presidentit, që të ketë një shumicë legjitime dhe të përdorë trafikun e votave për një president jolegjitim të një shumice legjitime. Filozofia e tij është që me “hijen” e pushtetit t’i marrë të gjithë zvarrë pas vetes, t’i përbaltë, t’i mundë dhe në fund t’i flakë.
Llogaritë e tij mbi presidentin bëhen nga pozicioni i tij si kryeministër i një shumice legjitime dhe nga shembujt e shpërblimit që ka dhënë ndaj atyre që i kanë dhënë pushtetin dhe shembujt e ndëshkimit ndaj atyre që i kanë dalë kundër. Në një farë mënyre Berisha po i mund të gjithë me hijen e vet, dhe jo me fuqinë reale që ka. Në shoqërinë shqiptare tashmë ekziston miti i tij si një udhëheqës i fortë që nuk mundet, ekziston miti i tij si një hakmarrës, ekziston miti i tij si një shpërblyes i madh, ekziston miti i tij si një pazarxhi i madh dhe si për ironi të fatit kur ia bashkojnë bashkë gjithë këto pisllëqe, formojnë dhe mitin e tij si “politikan i madh”. Të gjitha këto i “besohen” se ai është në pushtet dhe ka mundësi t’i realizojë.
Për të çmontuar këtë hije të frikshme të tij, LSI, nëse e ka seriozisht betejën me të, duhet të çmontojë koalicionin qeveritar. Përpjekjet e tij për të gjetur një president brenda gardhit janë qartazi në kundërshtim me platformën e saj politike dhe angazhimet e saj publike për një proces që duhet të shkojë në një gjatësi vale me Evropën dhe duhet të dalë nga koalicioni, para se Berisha të legjitimojë procesin e zgjedhjes së presidentit të tij me LSI në koalicion. Dalja nga koalicioni është akt politik, që i tregon Perëndimit se Presidentin nuk po e zgjedh as shumica, por klani Berisha me pare të pista. Një dalje në opozitë e LSI para se Berisha ta përdorë atë si noterizuese të procesit të një presidenti me 71 vota, do të bënte që procesi të delegjitimohej dhe Berisha të gjendej përballë alternativës së dytë, asaj të votëbesimit.
Problemi i dytë që ekziston në këtë Kuvend, përveç partive të vogla, janë ata që quhen deputetë të pavarur. Kastriot Islami, Dritan Prifti, por dhe Gazmend Oketa, janë deputetë të ikur nga paritë me të cilat kanë marrë mandatin, dhe në lojën e numrave natyrisht që marrin rëndësi. LSI, si partia më e madhe ndaj të vegjëlve, duhet që jo vetëm të bëjë aktin e largimit nga qeveria, por duhet të formojë një pol të partive të vogla në Kuvend, të cilat bashkohen në një pikë, atë të Presidentit konsensual. Kjo aleancë parlamentare e re, nëse realizohet ende pa u konsumuar ky proces, do t’i japë partive të vogla peshën që tentuan t’u heqin dy partitë e mëdha me reformën kushtetuese. Nëse ato formojnë polin e Presidentit konsensual në Kuvend, atyre u lind e drejta që ta diktojnë atë, ose të diktojnë një shumicë të re në vend. Fuqia për të bërë bashkë deputetët e partive të vogla në Kuvend si kusht ndaj dy partive të mëdha, do t’i japë legjitimitet real procesit të presidentit konsensual.
Një pol i tillë parlamentar do të sillte një pasuri të re në jetën politike shqiptare të këtij muaji, por mbi të gjitha do ndalte tërheqjen zvarrë që Berisha po i bën parlamentit drejt presidentit të tij. Një pol i tillë ka shanse reale dhe të drejtën legjitime të votëbesojë dhe Berishën si kryeministër nëse ai tenton të shkatërrojë deri në fund procesin dhe të mos i bindet kandidatit të tyre. Dhe siç dihet, ai proces është shumë i thjeshtë. Të vegjlit në qeveri me disa ministra teknikë si shtesë dhe vota mbështetëse të opozitës e çojnë Berishën më shpejt se ç’mendon dhe ai vetë në pension. Berisha po tenton t’i marrë zvarrë si kryeministër deri sa të zgjedhë Presidentin, kurse ata duhet ta detyrojnë të zvarritet pas tyre.
Keni për të parë sa qesharak do të duket, sa i dobët, sa banal, sa frikacak dhe sa i përunjur kur të numërojë në tabelë 71 vota kundër tij. Dhe sa shumë trima do dalin pastaj kundër tij rrugëve, në parlament, biles dhe në PD.
__________________
I am the author of my life;
unfortunalty, I'm writing in pen & can't erase my mistakes.
Denonco këtë mesazh tek moderatorët | IP: e regjistruar
|
26 Maj 2012 11:49
Forumi Horizont > Media dhe Politika > Politika Shqiptare > 2012 - Votimi: Presidenti i shqiperise
