Regjistruar: 10/01/2003
Vendbanimi: .
Mesazhe: 5233

Gjergj Buxhuku

Me një rastësi çuditërisht të përsëritur, kur është fjala për ngjarje madhore të Kosovës, përkojnë zgjedhjet e përgjithshme në Shqipëri me hapjen e dritës jeshile për statusin e gjysmës tjetër të kombit, nga OKB-ja në mbledhjen e së premtes të OKB-ja në Uashington. Për herë të parë, në OKB u theksua qartë se tashmë Kosova është e përgatitur për të filluar diskutimin e statusit përfundimtar të saj. Në këtë drejtim, vendimi i fundit për Kosovën përbën një zhvillim të jashtëzakonshëm në planin strategjik, diplomatik dhe politik për të ardhmen e të gjithë shqiptarëve dhe çështjes kombëtare. Por, nga ana tjetër, përparimi i çështjes kombëtare në Kosovë ka bërë që edhe armiqtë historikë të shqiptarëve të mobilizohen për të bërë ç’është e mundur të pengojnë me të gjitha mënyrat e mundshme. Rasti nuk mungon dhe ky është pikërisht afrimi i zgjedhjeve të përgjithshme në Shqipëri. Formula është shumë e thejshtë: nëse zgjedhjet e Shqipërisë do të jenë me probleme dhe do të shkaktojnë turbullira, atëherë armiqtë shekullorë të shqiptarëve do të kenë argumentin më të mirë për të shpalosur në tavolinat e diplomacisë ndërmbëtare. duke përsëritur tezën e mirënjohur të tyre se deri më tash shqiptarët nuk janë të aftë të ndërtojnë shtet. Aq më shumë përforcohet kjo, sipas logjikës së armiqve tanë shekullorë, sepse kur këtë gjë nuk e bëjnë as shqiptarët e shtetit, që formalisht ka pothuajse një shekull që është formuar, imagjino se ç’mund të presim nga pjesa tjetër e kombit me histori shtetformuese të barabartë me zero në terma kohorë. Kjo flet për lidhjen e fuqishme të zhvillimit të ngjarjeve në Shqipëri dhe në Kosovë, si për të provuar se janë dy pjesë të të njëjtit trup. Megjithatë, historia është më ndryshe sesa më sipër.
Gjatë viteve të pasçlirimit të 1999-ës, shqiptarët e Kosovës, në mënyrë pothuajse shembullore, filluan të riorganizojnë institucionet e tyre vetëqeverisëse nëpërmjet zhvillimit të zgjedhjeve të përgjithshme dhe vendore dhe njëkohësisht të përvetësojnë artin e drejtimit të shtetit në kushtet e demokracisë. Ndihma e vendeve demokratike të botës me në krye SHBA-në, në përvetësimin sa më shpejt të elementëve bazë të qeverisjes, ishte e paçmuar. Në mënyrë të njëpasnjëshme, pavarësisht kufizimeve të Rezolutës 1 244, Kosova filloi praktikisht të krijojë fytyrën e shtetit. Përmendim aprovimin e Kushtetutës, proceset zgjedhore, krijimin e institucioneve bazë të shtetit si ministritë, kryeministri, presidenti, Kodit Penal të ndryshëm nga ai i Serbisë, fillimin e procesit të privatizimit të ekonomisë publike etj., që përbëjnë elementë thelbësorë të pavarësisë së një shteti.
Pavarësisht nga sa më sipër, duhet të pranojmë se tri vite janë shumë pak për të mësuar drejtimin më të mirë të mundshëm të shtetit, aq më shumë duke patur parasysh se bëhej fjalë për kompetenca jomaksimale qeverisëse të kaluara në mënyrë graduale në duart e vendorëve nga autoritetet e UNMIK-ut. Gjithashtu, nuk duhet harruar se nga ana tjetër, janë përfaqësuesit e një shteti si Serbia me eksperincë shtetformuese pothuaj 150-vjeçare, që pavarësisht rrudhjeve territoriale, ekonomike dhe politike të periudhës së fundit nuk do ta pranojnë lehtësisht humbjen e një beteje që edhe ata vetë e kanë të qartë se e kanë të pamundur ta fitojnë. Lëvizjet e politikës serbe, që fillojnë me Kushtetutën e shtetit serb, ku Kosova u konsiderua pjesë e Serbisë, me protestat e vazhdueshme në OKB dhe institucionet e tjera ndërkombëtare përsëritur qartë edhe në mbledhjen e fundit të Këshillit të Sigurimit, e tregojnë qartë se bisedimet që fillojnë së shpejti dhe nuk dihet se kur do të mbarojnë, do të jenë të vështira. Aleatët historikë të serbëve në rajon dhe ku bie në sy mbi të gjitha shteti dhe politika greke dhe më gjerë, janë gjithashtu një ndihmë që duhet konsideruar me kujdes.
Përgjegjësia e përfaqësuesve të shqiptarëve të Kosovës është e madhe në bisedimet e pritshme pas vendimeve të fundit të OKB-së.
Duhet të theksojmë se kushtet e përgjithshme gjeostrategjike të politikës ndërkombëtare janë të favorshme për ne. Ajo çka te gjithe shqiptarët duhet të tregojnë në këto çaste vendimtare për të gjitha çështjet kombëtare, qe ka lidhje me të ardhmen tonë si komb në gjirin e Evropës së Bashkuar, është t’i tregojmë botës se jemi të aftë të ndërtojmë shtet demokratik. Në këtë kuptim, më shumë se shqiptarët e Kosovës duhet të jemi ne në pjesën e shtetit shqiptar të njohur “de jure’ nga ndërkombëtarët, që na takon ta tregojmë. Dhe rast më të mirë sesa zgjedhjet e 3 korrikut në Shqipëri nuk mund të ketë. Zhvillimi i zgjedhjeve të lira dhe të ndershme, janë provë gjenerale jo vetëm për Shqipërinë në përpjekjet e saj në procesin e integrimit në BE, por janë një shembull i qartë dhe një ndihmë e madhe edhe pëer Kosovën në pëerpjekjet e saj për pavarësi. Politika, qeveria dhe institucionet shtetërore përgjegjëse kanë shansin dhe detyrën t’i tregojnë te gjithëve se edhe shqiptarët dinë të bëjnë shtet demokratik, d.m.th janë të aftë të respektojnë rregullin bazë të sistemit demokratik, zgjedhjet e lira dhe të ndershme. Kjo do të jetë edhe ndihma më e madhe, që mund t’i japim për momentin Kosovës dhe çështjes kombëtare dhe këtë nuk duhet ta harrojmë. Shqipëria ka nevojë për ndryshim dhe për stabilitet njëkohësisht. Fatkeqësisht shumë shenja të deritanishme tregojnë që situata zgjedhore në Shqipëri është e ndërlikuar. Në fakt, të gjitha veprimet ligjore të deritanishme që fillojnë me mënyrën e përgatitjes së formulës zgjedhore, tërësisht në kundërshtim me frymën e Kushtetutës dhe vullnetin e qytetarëve, provokimet e privatizimeve antikombëtare të sektorëve strategjikë, masat e pamjaftueshme organizative si edhe deklaratat partiake flasin për klimë të nxehtë. Të shpresojmë që situata të mos jetë shpërthyese. Në rast të kundërt, pasojat do të jenë të pallogaritshme në dëm të të gjithë shqiptarëve. Zgjedhjet e Shqipërisë ndikojnë shumë në statusin e Kosovës.

__________________
It takes just as much courage to express your love when it's right, as it does to walk away when it's wrong.

Denonco këtë mesazh tek moderatorët | IP: e regjistruar