Regjistruar: 02/02/2004
Vendbanimi: U.S.WASHINGTON
Mesazhe: 663

Grada e perdoruesve-ve: / 1
I varferI mire
Monday, 17 September 2007
Hyn në shqyrtim projektligji “Për dëmshpërblimin e ish të dënuarve politikë të regjimit komunist”. Trajtimi i projektligjit në fjalë është shtyrë në të dy komisionet kompetent si nga komisioni i Ekonomisë ashtu edhe ai i Ligjeve. Një fakt i rëndësishëm i këtij projektligji që do të shqyrtohet ditët në vijim është edhe dëmshpërblimi për ish-agjentët e regjimit komunistit. Këta të fundit përfshihen tek kategoria e personave që janë futur në rrjetin e spiunazhit me dhunë dhe forcë. Këtë fakt e ka bërë të ditur anëtari i Komisionit të Ekonomisë, Blerim Çela.Ky projektligj është pjesë e një pakti të rëndësishmi masash, që parashikojnë sigurimin e një jete më dinjitoze për ish të dënuarit politikë të regjimit komunist si dhe familjarët e viktimave. Gjithashtu, ky projektligj shënon përmbushjen e një premtimi të madh politik, bërë nga mazhoranca e sotme ndaj përfaqësuesve të shtresës më të vuajtur të shoqërisë shqiptare. Ligji synon të dëmshpërblejë kontingjentin më të ndjeshëm të ish të persekutuarve politikë, persona, qe kanë vuajtur drejtpërdrejt dënimin në burgjet komuniste. Kjo zgjidhje u krye, jo vetëm për shkak të gjendje së mjerueshme sociale, të një pjese të madhe prej tyre, por dhe të nevojës që dëmshpërblimi të jetë i drejtë dhe porpocional. Nga të dhënat vihet re se pjesa më e madhe e ish të dënuarve politikë që jetojnë i takojnë moshës së tretë, shumica e të cilëve ka humbur anëtarët e familjes apo jetojnë të veçuar, ndërsa ish të dënuarit politikë, të grup moshës 50-60 vjeçare, janë dhe krye familjarë, prindër të fëmijëve të mitur. Këta persona përballen me probleme materiale, si dhe me probleme të mprehta strehimi apo dhe me mungesa të tjera të përditshme jetësore. Për të gjitha këto fakte projektligji synon të dëmshpërblejë këta të dënuar, familjarët e tyre si dhe familjarë të viktimave të regjimit komunist. Projektligji është edhe një ndjesë kolektive, që shteti shqiptar u kërkon shtetasve të huaj, të cilët kanë vuajtur dënime të padrejta. Në veçanti synohet të dëmshpërblehen të gjithë të huajt që kanë ardhur në Shqipëri pas viteve 50, si bashkëshortë të shtetasve tanë, të cilat, pa shkak ligjor, humbën familjet dhe u dënuan pa të drejtë për krime politike, për të cilat dëmshpërblimi do të kryhet sipas rregullave të ligjit në shërbimin tonë konsullor. Nga ana teknike projektligji synon jo vetëm të caktojë masën e dëmshpërblimit për familjarët e viktimave apo të dënuarit politikë por edhe të përcaktojë një procedurë të qartë e transparente, për të gjithë personat. Projektligji në thelb është një ligj procedural, për zbatimin e një skeme financiare dëmshpërblimi, që garanton që procesi të jetë sa më transparent dhe i mbikëqyrur periodikisht jo vetëm nga pushteti ekzekutiv apo Kuvendi i Shqipërisë por edhe nga çdo qytetar apo grup interesi. Sipas projektligjit , autoriteti përgjegjës për dorëzimin e kërkesës është Ministria e Drejtësisë, ndërsa miratimi i kërkesës bëhet nga Këshilli i Ministrave. Shpërndarja e dëmshpërblimit do te kryhet nga ministria e Financave, e cila në përputhje me fondet buxhetore, do të bëjë shpërndarjen, nëpërmjet llogarive bankare, në emër dhe për llogari të ish të dënuarve politikë.
Procesi
Banka e Shqipërisë dhe Kuvendi janë institucione të cilat, sipas këtij ligji, mbikëqyrin pjesë të veçanta të këtij procesi, që asnjë fond publik të mos shpërdorohet. Kontrolli i Lartë i Shtetit është institucioni, që do të mbikëqyrë Ministrinë e Drejtësisë për dosjet e administruara. E gjithë procedura është e hapur dhe transparente dhe çdo i interesuar mund të marrë informacion për gjendjen e kërkesës të tij dhe shqyrtimin e drejtpërdrejtë, në faqen zyrtare të Ministrisë së Drejtësisë. Projektligji synon të shmangë sa më shumë mundësitë për abuzime me fondet shtetërore, si dhe të shmangë burokracitë në shqyrtimin e kërkesave. Projektligji përcakton kriteret e shpërndarjes së fondeve, bazuar në sugjerimin e përfaqësuesve të kësaj shtrese, të cilët kërkuan që shpërndarja të ishte e barabartë për të gjitha kategoritë, pa favorizuar asnjë grup të veçantë të dënuarish( ish të burgosurit dhe ish të internuarit që jetojnë apo familjarët e të pushkatuarve) për shkak të moshës a gjendjes sociale. Për këtë arsye, parashikohet që të gjitha subjektet, që do të përfitojnë dëmshpërblimin sipas këtij ligji, të përfitojnë një shumë deri në 1 000 000 lekë dhe pjesa e mbetur, nëse ka, të shpërndahet me këste të tjera, vetëm pasi të jetë marrë kësti i parë edhe nga i përndjekuri i fundit. Projektligji përcakton se, dëmshpërblim, sipas këtij ligji, përfiton çdo person, që ka vuajtur dënim penal politik, në kuptim të këtij ligji, për çdo ditë heqje lirie apo izolimi, për vepra penale politike, në institucionet penitenciare apo në një institucion mjekësor, psikiatrik a jopsikiatrik. Sipas këtij projektligji do të dëmshpërblehen edhe personat e internuar deri në vitin 1954, në kampe me tela me gjemba, si dhe familjarët e të dënuarve politikë, të pushkatuar apo ekzekutuar, brenda periudhës 30.11.1944-1.10.1991.
Kriteret
Sipas këtij ligji përfiton dëmshpërblim çdo person i dënuar me burgim apo internim, i cili duhet të plotësojë këto kritere: Të jetë dënuar me heqje lirie apo izolim në hetuesi a në një institucion psikiatrik mjekësor, për shkak të një vendimi gjykate, të formës së prerë, apo urdhrave të hetuesisë, të dhëna gjatë periudhës 30.11.1944 deri në 1.10.1991; Të jetë dënuar me heqje lirie apo izolim në hetuesi a në një institucion mjekësor psikiatrik me vendim gjyqësor, të formës së prerë apo urdhër të hetuesisë, për shkak të një vepre penale politike, siç përcaktohet në nenin 5, të këtij ligji; Të ketë vuajtur dënim penal të padrejtë, plotësisht ose në mënyrë të pjesshme. Të mos ketë asnjë cilësi, funksion apo detyrë, të përcaktuar në këtë ligj, para, gjatë apo pas vuajtjes së dënimit politik, në periudhën 30.11.1944-1.10.1991. Të mos ketë kryer veprime të dëmshme, me pasoja ndaj jetës së shtetasve të tjerë, e vërtetuar kjo me vendim gjyqësor, të formës së prerë. Të njëjtat kushte janë të vlefshme edhe për dëmshpërblimin e familjarëve të viktimave të ekzekutuara.
Masa e shpërblimit
Masa e shpërblimit për çdo të dënuar politik, për çdo ditë vuajtje dënimi të kryer, në burg, spital psikiatrik, spital burgu, izolim në hetuesi është e barabartë në masën 2 000 lekë në ditë. Për të dënuarit me internim, në kamp me tela me gjemba, deri në vitin 1954, kjo masë është përcaktuar 1 000 lekë në ditë. Kjo masë dëmshpërblimi është përcaktuar në analogji të drejtpërdrejtë me masën e dëmshpërblimit, të përcaktuar në ligjin për kompensimin për burgim të padrejtë. Për familjarët e viktimave të ekzekutuara, për çdo viktimë, dëmshpërblimi do të jetë i barabartë me 8 vite burg. Sipas të dhënave të paraqitura nga shoqata e të përndjekurve, edhe pse këto të dhëna duhen marrë me rezervë, për shkak të abuzimeve të shumta, të evidentuara gjatë këtij procesi, kur mbi 7 mijë dënime ishin ordinere. Nga verifikimet e kryera nga Ministria e Drejtësisë dhe Ministria e Brendshme rezultojnë të sakta dënimet vetëm për 11 mijë persona, nga të cilët: 5 100 dënime penale të sakta, me hyrje-dalje nga burgu, gjithsej 7 570 412 ditë (20 741 vjet) dënimi të kryera, dhe 2 000 të pushkatuar. Fatura financiare për këto dënime është 417 milionë dollarë. Gjithashtu, janë edhe (87 831 vjet) vite dënimi me burgim, të përllogaritura sipas vendimit gjyqësor, për të cilat do të verifikohet koha reale e daljes nga burgu. Pas verifikimit edhe kjo kosto duhet t’i shtohet faturës financiare, së bashku me saktësimet për vuajtjen e internimit.

7 mijë dënimet e cilësuara ordinere:

Të pushkatuar 6 027 persona

Të Sëmurë psikikë 286 persona

Të dënuar me burgim 16 585 persona

Të vdekur në burgje 1 065 persona

Gjithsej grupi A 6 313 persona

Gjithsej grupi B 17 650 persona

Vite burgu 91 400 vjet

Vendimet që prekin kategoritë që do të dëmshpërblehen:

Vendimi “Dënim me vdekje”, të paekzekutuar, si pasojë e rrëzimit të sistemit komunist më 1.10.1991;

Vendimi “Dënim me burgim të përjetshëm”;

Vendimi “Dënim me burgim”;

Vendimi “Dënim me mjekim të detyruar”;

Vendimi “Dënim me vendosje në një institucion mjekësor a mjekësor psikiatrik”

Vlera e masës së shpërblimit sipas dënimeve
Masa e shpërblimit për çdo të dënuar politik, për çdo ditë vuajtje dënimi të kryer, në burg, spital psikiatrik, spital burgu, izolim në hetuesi është e barabartë në masën 2 000 lekë në ditë. Për të dënuarit me internim, në kamp me tela me gjemba, deri në vitin 1954, kjo masë është përcaktuar 1 000 lekë në ditë. Kjo masë dëmshpërblimi është përcaktuar në analogji të drejtpërdrejtë me masën e dëmshpërblimit, të përcaktuar në ligjin për kompensimin për burgim të padrejtë. Për familjarët e viktimave të ekzekutuara, për çdo viktimë, dëmshpërblimi do të jetë i barabartë me 8 vite burg. Sipas të dhënave të paraqitura nga shoqata e të përndjekurve, edhe pse këto të dhëna duhen marrë me rezervë, për shkak të abuzimeve të shumta, të evidentuara gjatë këtij procesi, kur mbi 7 mijë dënime ishin ordinere. Nga verifikimet e kryera nga Ministria e Drejtësisë dhe Ministria e Brendshme rezultojnë të sakta dënimet vetëm për 11 mijë persona, nga të cilët: 5 100 dënime penale të sakta, me hyrje-dalje nga burgu, gjithsej 7 570 412 ditë (20 741 vjet) dënimi të kryera, dhe 2 000 të pushkatuar. Fatura financiare për këto dënime është 417 milionë dollarë. Gjithashtu, janë edhe (87 831 vjet) vite dënimi me burgim, të përllogaritura sipas vendimit gjyqësor, për të cilat do të verifikohet koha reale e daljes nga burgu. Pas verifikimit edhe kjo kosto duhet t’i shtohet faturës financiare, së bashku me saktësimet për vuajtjen e internimit

__________________
"Një burrë mund t?i japë dinjitet rangut të tij, por asnjë
rang s?mund t?ia shtojë dinjitetin një burri ? "

Denonco këtë mesazh tek moderatorët | IP: e regjistruar

Regjistruar: 02/02/2004
Vendbanimi: U.S.WASHINGTON
Mesazhe: 663

Shoqatat e të përndjekurve politikë, pjesëmarrëse në komisionin e Ekonomisë, kanë paraqitur para deputetëve të këtij komisioni kundërshtitë e tyre në lidhje me ligjin e dërguar nga qeveria në Kuvend “Për dëmshpërblimin e të përndjekurve politikë”. Nga ana e tyre, ish-të përndjekurit kundërshtuan me forcë një sërë nenesh, por debatet më të mëdha i hapi neni 6 i projektligjit, i cili bën fjalë për përjashtimin nga dëmshpërblimi të një kategorie personash. Nga ana tjetër, ligji kërkon nisjen e procedurave nga e para për marrjen e statusit për një kategori personash, por në shumë raste kjo mund të jetë e pamundur, pasi në disa raste duhen dëshmitarë, të cilët mund të kenë vdekur përgjatë këtyre 15 vjetëve. Anëtarët e komisionit parlamentar për Ekonominë dhe Financat, pasi dëgjuan ankesat e shoqatave, janë shprehur se të gjitha propozimet do të diskutohen me ministrin e Drejtësisë dhe të Financave, me qëllim përpunimin e projektit.

Ankesat

Përfaqësuesit e shoqatave të ish-të përndjekurve politikë kanë dalë të paktën kundër katër neneve të projektligjit të qeverisë. Bëhet fjalë dhe për nenin 3, ku përjashtohen ata që janë përjashtuar përpara 30 nëntorit 1944. Për këtë, përfaqësuesit e shoqatave, sqaruan se nga gushti i 1943 deri në nëntor të 1944, janë pushkatuar pa gjyq rreth 4000 vetë, që sipas tyre duhet të marrin dëmshpërblim. Lidhur me masën e shpërblimit, disa propozuan rritjen nga 2 000 lekë që parashikon projekti, në 5 000 lekë në ditë për çdo të dënuar politik. “Asnjë nuk vajti para togave të zeza për t’u pushkatuar, asnjë nuk hodhi hekurat në duar dhe vajti vullnetarisht para togave të zeza për t’u pushkatuar, asnjë nga të 60 mijë familjet nuk u shpërngul vullnetarisht, për të shkuar në kampe me tela, me policë me gatishmëri te koka”, - u shpreh kreu i Shoqatës Kombëtare Antikomuniste të të Përndjekurve Politikë të Shqipërisë, Skënder Qendro. Ndërkohë, nga anëtarët e komisionit u argumentua se një shtesë e tillë do të bënte që fatura financiare e ligjit të arrijë shumën e 1 miliard eurove, shumë kjo e papërballueshme për buxhetin e shtetit.

Fondi

Ndërkohë, debatet mes shoqatave dhe qeverisë rrezikojnë të djegin fondin prej 4 milionë eurosh të vënë në dispozicion nga qeveria për këtë qëllim

Ish-ministri i Financave, Arben Malaj, do t’i propozojë komisionit të Ekonomisë të shtojë një nen në projekt, sipas të cilit, fondi i miratuar nga qeveria për këtë vit të jetë i trashëgueshëm për vitin pasardhës. Kjo ide e mbështetur edhe nga deputeti Bujar Leskaj, konsiston në moslejimin e djegies së fondit, pavarësisht zvarritjes së fillimit të procedurave për dëmshpërblim.

Liri Belishova kërkon zgjidhje dhe për internimin

Një prej përfaqësuesve të ish-të përndjekurve politikë, Liri Belishova, kërkoi para deputetëve të komisionit të Ekonomisë që pagesat për ata që kanë vuajtur në kampet e internimit të jetë e ndryshme me ata që u detyruan të shpërngulen nga njëri qytet në tjetrin dhe të punojnë në kushte të vështira. “Me 1 000 lekë të reja në ditë, të dëmshpërblehen ata që kanë qenë në kampe pa tela me gjemba, si dhe ata që kanë jetuar në kushte të rrepta izolimi. Ndërsa ata që u shpërngulën nga qytetet dhe që u detyruan të punojnë në kushte të vështira, duhet të dëmshpërblehen me 300 lekë të reja në ditë”, - tha Belishova. Po ashtu, sipas saj, projekti është përgatitur shumë keq, pasi ai nuk ka marrë parasysh nenet e Kushtetutës dhe konventat ndërkombëtare që vendi ynë ka nënshkruar. Konventat parashikojnë detyrimin që ka shteti shqiptar të dëmshpërblejë këdo që është dënuar në mënyrë të padrejtë. “Në këtë mënyrë, lihet jashtë Instituti i Integrimit, i cili duhet të funksionojë. Po ashtu, ligji nuk parashikon ankimimin e ish-të dënuarve politikë. Për këtë mendoj të ngrihet një komision, i cili të merret me këtë çështje dhe në përbërje të tij të jenë 2 anëtarë nga shoqatat e ish-të dënuarve dhe të përndjekurve politikë dhe 3 përfaqësues të qeverisë, një nga Ministria e Drejtësisë, një nga Ministria e Financave dhe një nga Ministria e Punës dhe Çështjeve Sociale”, - përfundoi Belishova.


Mazhoranca e opozita, sherr për premtimet

Deputetët e mazhorancës dhe të opozitës janë konfrontuar dje mes njëri-tjetrit lidhur me mundësitë dhe premtimet që secila palë ka bërë për të dëmshpërblyer ish-të përndjekurit politikë. Duke marrë shkas nga një diskutim i një përfaqësuesi, ish-ministri i Turizmit, deputeti i Partisë Demokratike, Bujar Leskaj, theksoi përgjegjshmërinë, me të cilën qeveria e së djathtës do të shpërblejë ish-të përndjekurit dhe të dënuarit politikë. “Zotërinj të nderuar, qeveria e Partisë Demokratike ju dëmshpërblen në ditë, aq sa qeveria socialiste ju dëmshpërblente për një muaj. Pra, qeveria socialiste parashikoi 1500 deri 2000 lekë në muaj. Ne kaq ju japim në muaj”, - theksoi Leskaj. Gjithashtu, ai kujtoi se çështja e tyre është diskutuar nga grupi parlamentar i PD, në mbledhjen më të fundit të tij. Si kundërpërgjigje të kësaj, ish-ministri i Financave, i kujtoi kolegut të tij Leskaj, premtimin e dikurshëm të kryeministrit Berisha, sipas të cilit, kur të vinte ai në pushtet, do t’i dëmshpërblente të përndjekurit politikë me 90 dollarë në ditë.

__________________
"Një burrë mund t?i japë dinjitet rangut të tij, por asnjë
rang s?mund t?ia shtojë dinjitetin një burri ? "

Denonco këtë mesazh tek moderatorët | IP: e regjistruar

Regjistruar: 02/02/2004
Vendbanimi: U.S.WASHINGTON
Mesazhe: 663

ALBANA LIKA
18/09/2007 Të internuarit do të dëmshpërblehen me 500 lekë dita

Komisioni i ligjeve merr në dorëzim kërkesat e shoqatave dhe propozimet për ndryshimin e ligjit

Shoqatat e ish-të përndjekurve politikë kanë kërkuar që Kuvendi të hapë dosjet për politikanët, drejtuesit e institucioneve kushtetuese, të administratës qendrore dhe lokale, të mediave dhe më pas të të përndjekure politikë. Gjithashtu, ata kanë kërkuar nga komisioni i Ligjeve, ku paraqitën gjatën një seance dëgjimore ankesat e tyre mbi projektligjin e qeverisë për të dëmshpërblimin e ish-të përndjekurve politikë, që të internuarit pas 1945 të dëmshpërblehen për çdo ditë vuajtjeje me 500 lekë.

Seanca

Komisioni parlamentar i Ligjeve ka zhvilluar dje një seancë dëgjimore me të gjithë përfaqësuesit e shoqatave të ish-të dënuarve dhe të përndjekurve politikë. Ata kanë paraqitur rezervat dhe propozimet e tyre ndaj projektit të qeverisë “Për dëmshpërblimin e të përndjekurve politikë”. Ata kanë kërkuar shfuqizimin e nenit 6 të projektit, sipas të cilit disa kategori nuk përfitojnë dëmshpërblim, dhe kanë kërkuar që atë ta përfitojnë të gjithë ata persona që plotësojnë kriteret e përcaktuara në ligjin “për statusin e të përndjekurve politikë”. Në mënyrë të veçantë, për ta, deputet përpara zgjedhjeve të 31 marsit 1991, është funksion i pajtueshëm për përfitimin e dëmshpërblimin. “Pikat ç, d, dhe e, të shfuqizohen me arsyetimin se hapja e dosjeve nuk duhet filluar nga viktimat e komunizmit që kanë qenë të detyruara të bashkëpunojnë me ish-Sigurimin e shtetit nën presionin e këtij të fundit, por sipas rezolutës së miratuar nga Kuvendi i Shqipërisë për dënimin e krimeve të kryera nga regjimi komunist, ato duhet të hapen më parë për politikanët, drejtuesit e institucioneve kushtetuese, atyre të sistemit të drejtësisë, të administratës qendrore dhe lokale, si dhe të mediave dhe pas tyre dhe të përndjekurve politikë”, thuhet në propozimet e shoqatave. Neni 6, sipas tyre, bie ndesh me nenin 44 të Kushtetutës de Konventës Ndërkombëtare të Njeriut.

Të internuarit

Shoqatat e ish-të përndjekurve kanë kërkuar që me dënim penal të padrejtë, me efekt dëmshpërblimi, të konsiderohen edhe të internuarit pas vitit 1945 deri në vitin 1991, të dokumentuar nga Ministria e Brendshme. Po ashtu, edhe të ekzekutuarit pa gjyq të periudhës 01-08-1943 deri në 01-10-1991. Gjithashtu, ata kërkojnë që çdo i internuar pas vitit 1945 të dëmshpërblehet me 500 lekë për çdo ditë vuajtjeje, çdo i vdekur në hetuesi ose në burg pa mbushur kohën prej 8 vjetësh të dëmshpërblehet si i pushkatuar dhe që çdo i pushkatuar me ose pa gjyq nga 01-08-1943 deri në 01-10-1991, të dëmshpërblehet sipas Kodit Penal për hetuesinë për një periudhë prej 8 vjetësh. Lidhur me termin familjar në kuptimin e këtij ligji, ata propozojnë të cilësohen të gjithë trashëgimtarët e parashikuar në Kodin Civil mbi trashëgiminë.

Shtyhet diskutimi me përfaqësuesit e qeverisë

Komisioni parlamentar i Ekonomisë dhe Financave ka shtyrë për sot mbledhjen e djeshme për nisjen nga shqyrtimi të projektligjit “Për dëmshpërblimin e të përndjekurve politikë”. Shkak për këtë është bërë mungesa e një përfaqësuesi të qeverisë, i cili do të bëjë avokatinë e projektit, si dhe përgjigjet në emër të ekzekutivit për ndryshimet që mund të pësojë projekti në kuadër të propozimeve që shoqatat e të përndjekurve kanë paraqitur në komision. Zhvillimi i mbledhjes së këtij komisioni me këtë rend dite, mbetet në pikëpyetje për t’u zhvilluar edhe sot, pas refuzimit të palëve për ta mbajtur këtë projekt. Kjo për shkak të ndryshimit të posteve në kabinetin qeveritar, ndërkohë që projekti është hartuar para realizimit të këtyre ndryshimeve. Përfaqësuesi i qeverisë do të përgjigjet gjithashtu edhe për faturën e projektligjit, i cili me statistikat aktuale shkon rreth 500 milionë dollarë. Ky është takimi i dytë që komisioni i Ekonomisë duhet të zhvillojë për këtë çështje, pas ezaurimit të seancës dëgjimore me shoqatat e ish-të përndjekurve politikë. Para një javë ata paraqitën tek ky komision, të gjitha kundërshtitë mbi ligjin e qeverisë. Ndërsa ish-ministri i Financave Arben Malaj, do t’i propozojë komisionit të Ekonomisë të shtojë një nen në projekt, sipas të cilit, fondi i miratuar nga qeveria për këtë vit, të jetë i trashëgueshëm për vitin pasardhës. Kjo ide e mbështetur edhe nga deputeti Bujar Leskaj, konsiston në moslejimin e djegies së fondit, pavarësisht zvarritjes së fillimit të procedurave për dëmshpërblim.

__________________
"Një burrë mund t?i japë dinjitet rangut të tij, por asnjë
rang s?mund t?ia shtojë dinjitetin një burri ? "

Denonco këtë mesazh tek moderatorët | IP: e regjistruar

Regjistruar: 02/02/2004
Vendbanimi: U.S.WASHINGTON
Mesazhe: 663

U desh shpërthimi i një bombe në një legatë të huaj, dhe pikërisht në atë të ish-Bashkimit Sovjetik, që shteti komunist shqiptar i asaj kohe të shpërthente në një valë të egër spastrimesh. Viktimat e radhës ishin ata për të cilët mendoheshe se ishin kontingjent i politikës anti-staliniste e cila po aplikohej gjërësisht nga Partia e Punës.

Më shumë se 56 vjet mё parё, pikёrshit mbrёmjen e 19 shkurtit 1951, forca tё shumta policore, hetues e prokurorё mbёrritёn nё Legatёn Sovjetike të Tiranës, pas zhurmёs sё krijuar nga njё shpёrthim i fuqishёm nё brendёsi tё ambienteve tё saj. Dёmet nga ky shpërthim, pikërisht nё garazhdin e makinave tё Legatёs Sovjetike, nё rrugёn e Durrёsit, atje ku sot ndodhet Ministria e Arsimit, ishin tё papёrfillshme. Pёrveç disa xhamave tё thyer, nё pjesёn e pasme tё ndёrtesёs, ishte shtrembёruar edhe dera e jashtme e garazhdit, qepeni dhe shinat e saj. Vetёm kaq mjaftoi pёr ndёrmarrjen e kombinacioneve apo masave tё ashpra tё represionit ndaj kundёrshtarёve imagjinarё tё regjimit, mbёshtetur mbi tё dhёnat e Sigurimit tё Shtetit. Ngjarja u mor me shumё zell nga Tirana zyrtare. Menjëherë u mblodh plenumi i KQ dhe më 20 shkurt Byroja Politike e PPSH.
Shkelja e ligjeve
Mehmet Shehu, atëherë ministër i Brendshëm, bëri ekspozenë e kësaj ngjarjeje dhe theksoi se “kjo është një ngjarje politike e kalibrit të madh, madje më e madhe se një atentat që mund të bëhej kundër ndonjërit nga ne”. Mehmet Shehu kërkoi masa represive të jashtëzakonshme, pa marrë parasysh ligjet në fuqi, meqenëse sipas tij “edhe herë tjetër kemi pushkatuar jashtë ligjeve në fuqi. Të arrestojmë rreth 100 apo 150 veta, nga të cilët 10 ose 15 prej tyre t i pushkatojmë, duke zgjedhur sigurisht ata më kryesorët. Kjo masë do të procedohet me një masë tjetër spastrimi nga Tirana të familjeve reaksionare brenda një muaji. Ne duhet t i përgjigjemi terrorit me terror dhe këtë mund ta bëjmë plot ndërgjegje dhe me gjakftohtësi. Ne i kemi përgatitur listat e arrestimeve dhe, po të jeni edhe ju dakord, veprojmë që sonte”.
Përvoja nga vrasja e Bardhok Bibës
Me sa dukej, sa herë që e ndjente veten ngushtë, kupola komuniste e Partisë së Punës i shkelte me të dyja këmbët ligjet që kishte miratuar po vetë. Këtë e vërtetoj dhe fjalë e ish ministrit të Brendshëm të asaj kohe Mehmet Shehu, i cili vetëm dy vite më pas do të emërohej në krye të ekzekutivit. “Një masë të tillë ne e kemi marrë edhe kur u vra Bardhok Biba, domethënë kemi pushkatuar edhe jashtë ligjeve në fuqi”, citohet Mehmet Shehu nga procesverbali i mbledhjes së Byrosë Politike të datës 20 shkurt 1951, vetëm pak orë nga shpërthimi i bombës enigmë në oborin e brendshëm të Legatës Sovjetike në Tiranë. Me të gjitha masat e konsideruara si të marra, ishin dakord jo vetëm të gjithë anëtarët e Byrosë Politike por dhe vetë Enver Hoxha, i cili ishte dakord me spastrimin që do të bëhej nëpërmjet levave të Ministrisë së Punëve të Brendëshme.
Nga procesverbali i mbledhjes së Byrosë Politike
Seanca e mbrëmjes e datës 20 shkurt dhe mbeten vetëm anëtarët e Byrosë Politike të Komitetit Qëndror
SHOKU KOMANDANT. – Tani të shohim një propozim të Mehmetit në lidhje me masat që duhet të marrim për atë që na ngjau në Legatën Sovjetike
SHOKU MEHMET SHEHU. – Çështja qëndron këtu. Mbrëmë në orën 7 e 47 minuta nga rrugica që është mbrapa Legatës Sovjetike është hedhur një dinamit i mbështjellë në letër dhe i lidhur me një fitil. Dinamiti u hodh brenda në oborr dhe ka plasur e ka thyer derën, penxheret dhe ka bërë një zhurmë të fortë. Me një herë kanë vajtur forcat për ndjekje por nuk kanë gjetur gjë. Pastaj kanë rënë pas shenjave dhe kanë kapur disa njerëz që ishin atje. Dyshimet tona rreth kësaj ngjarje janë se mund të jenë vazhda e një procesi, po pavarësisht në se është ndonjë nga ata që mendojmë ne apo jo ne duhet ta zbulojmë pa tjetër burimin dhe njerëzit e këtij atentati. Duke marrë parasysh se ky nuk është një aksion i thjeshtë por një ngjarje politike e kalibrit të madh, bile më e madhe se një atentat që mund të bëhej kundër ndonjërit nga ne, është e nevojshme politikisht qe ne të marrim masa represive të jashtëzakonshme pa marrë parasysh ligjet në fuqi. Një masë të tillë ne e kemi marrë edhe kur u vra Bardhok Biba, domethënë kemi pushkatuar edhe jashtë ligjeve në fuqi. Unë mendoj se këto masa që do të marrim duhet të jenë në një shkallë të tillë që elementi të përpunohet, elementi reaksionar i tipit Kacaruho etj, sonte t i arrestojmë. Të arrestojmë rreth 200 ose 250 vetë nga të cilët nja 10 ose 15 prej tyre t i pushkatojmë duke zgjedhur sigurisht ata më kryesorët, mbasi kanë dashur të organizojnë atentate të tjera. Kjo masë do të procedohet edhe me një masë tjetër spastrimi nga Tirana të familjeve reaksionare brenda një muaji. Ne duhet terrorit t i përgjigjemi me terror dhe këtë mund ta bëjmë me plot ndërgjegje dhe me gjakftohtësi. Ne i kemi përgatitur listat e arrestimeve dhe po të jeni dhe ju dakord veprojmë që sonte. Qysh mbrëmë ne kemi marrë masa për rruajtjen e të gjithë njerëzve sovjetikë që ndodhen këtu si këshilltarë, profesorë duke ju vënë nga njerëzit tanë për ti shoqëruar. Pjesa kryesore e tyre do të armatosen, pastaj kemi menduar të vemi rroje edhe në të gjitha objektet ku punojnë e banojnë këta, rrotull këtyre do të bë bëjmë pastrimin që të heqim familjet e dyshimta si dhe njerëz të tjerë që punojnë afër tyre, pse kemi vënë re që janë futur tek ata njerëz të poshtër dy shoferë jo të mirë. Këto masa mendojmë t i marrim kudo ku ka sovjetikë që janë këtu rreth dyqind veta prej tyre. Do të marrim gjithashtu masa me këtë rast, pra dhe disa masa më të mira për mbrojtjen e legatave të demokracive popullore, të cilat sot për st kanë vetëm një rroje. Me gjithë se në këto masa do të bëhen edhe mjaft harxhime po ne do të bëjmë se janë masa të domosdoshme dhe duhet t i marrim.
TË GJITHË ANËTARËT E BYROSË. – (Një zëri) Të gjithë jemi dakord me këto masa.
SHOKU MEHMET SHEHU. – Do të ishte mirë që ne si byro politike ti bënim një telegram shokut Stalin ku t i tregonim se si ka ndodhur kjo ngjarje, kjo fatkeqësi e madhe më mirë dhe ti premtojmë e ta sigurojmë se luftën kundra armiqve të jashtëm e të brendshëm do ta vazhdojmë akoma më me ashpërsi.
TË GJITHË SHOKËT ANËTARË TË BYROSË POLITIKE. – (Aprovojnë edhe këtë propozim të dytë të shokut Mehmet Shehu).
SHOKU BEQIR BALLUKU. – Po për çështjen e atyre që do të pushkatojmë ne duhet të gjejmë edhe një motivacion.
SHOKU MEHMET SHEHU. – Këtë gjë e lidhim me atë që donin të bënin në 8 shkurt.
SHOKU KOMANDANT. – Motivacioni të mos thuhet për atentat.
SHOKU MEHMET SHEHU. – Për këtë gjë duhet të flitet pak edhe me gjykatën dhe prokurorinë ushtarake.
(Mbyllet seanca e datës 20.2.1951)
Gjykimi rekord
Nga procesverbali i mbledhjes së Byrosë Politike të datës 20 shkurt 1951, shihet qartësisht se vendimi u mor në Byronë Politike, dhe në këtë rast kemi të bëjmë me një masakër politike të bërë me vendim partiak. E vetmja gjë që u bë nga Sigurimi i Shtetit kishte të bënte me përzgjedhjen e personave që do të pushkatoheshin apo burgoseshin. Nga listat e përgatitura me kohë në Ministrinë e Punëve të Brendshme u zgjodhën dhe u shënuan me kryq ata të cilët cilësoheshin“më të rrezikshmit” për momentin. Arrestimi, akuza dhe gjykimi u bë në një kohë rekord, ndërsa pushkatimi i 22 personave u krye më datë 26 shkurtit 1951, pra vetëm një javë nga dita e shpërdhimit të bombës në oborrin e Legatës Sovjetike.
Përgjunja shtetërore
Nuk ishte rasti i parë dhe as i fundit kur qeverisë shqiptare i duhej të servilosej përpara një fuqie të mëdha. Por në rastin konkret, përgjunja bëhej ndaj Bashkimit Sovjetik. Përveç shprehjes: “Qysh mbrëmë ne kemi marrë masa për rruajtjen e të gjithë njerëzve sovjetikë që ndodhen këtu si këshilltarë, profesorë duke ju vënë nga njerëzit tanë për t i shoqëruar”, që në fund të fundit ishte një detyrim i shtetit shqiptar, ajo që të bën më shumë përshtypje janë fjalët e tjera të shqiptuara nga Ministri i Brendshëm Mehmet Shehu: “Do të ishte mirë që ne si byro politike ti bënim një telegram shokut Stalin ku t i tregonim se si ka ndodhur kjo ngjarje, kjo fatkeqësi e madhe më mirë dhe ti premtojmë e ta sigurojmë se luftën kundra armiqve të jashtëm e të brendshëm do ta vazhdojmë akoma më me ashpërsi”. Të gjitha këto tregonin se në fund të fundit epoka e miqësisë me Jugosllavet kishte përfunduar, dhe miqësia me sovjetikët po konsolidohej gjithnjë e më shumë.

__________________
"Një burrë mund t?i japë dinjitet rangut të tij, por asnjë
rang s?mund t?ia shtojë dinjitetin një burri ? "

Denonco këtë mesazh tek moderatorët | IP: e regjistruar

Regjistruar: 02/02/2004
Vendbanimi: U.S.WASHINGTON
Mesazhe: 663

Së bashku me kategorinë e disidentëve të vërtetë, të ndëshkuar prej organeve të diktaturës komuniste të proletariatit, do të marrin dëmshpërblim edhe segmente që kanë qenë, njëherazi, pjesë dhe viktimë e kësaj diktatuare. Kështu ka vendosur grupi parlamentar i mazhorancës, në një mbledhje të ditës së mërkurë, në përpjekje për të ulur tensionin që ka shkaktuar Neni 6 i projektligjit të ri “Për dëmshpërblimin e ish-të dënuarve politikë të regjimit komunist”. Çfarë thotë konkretisht ky nen? Në ide të përgjithshme, ai përjashton nga përfitimi i dëmshpërblimit një sërë personash, të cilët, para se të ndëshkoheshin prej regjimit diktatorial të Enver Hoxhës & Co kanë patur të tilla poste që ndikonin drejtpërdrejt në zgjatjen e tij.

Në projektligjin e ri. këta individë përjashtohen nga përfitimi i dëmshpërblimit. Janë shtatë kategori profesionale, të cilët janë ndëshkuar si pasojë e luftës për pushtet brenda llojit dhe jo sepse kanë qenë disidentë, kontribues aktivë apo pasive kundër tij. Konkretisht, neni gjashtë i projektligjit të ri përcakton si jopërfitues: ish-punonjësin e sektorit për Sigurimin e Shtetit (shërbimi i fshehtë komunist), të Komitetit Qendror të PPSH-së, oficerin e Sigurimit të Shtetit (legal a ilegal), të reparteve të ndjekjes dhe ato të ruajtjes së personaliteteve, hetuesit, prokurorët, gjyqtarët a ndihmësgjyqtarët në procese politike speciale. Po ashtu, përjashtohen nga e drejta e përfitimit të dëmshpërblimit denoncuesi, dëshmitari i rremë ose rëndues në procese politike në dëm të të pandehurve, personi i regjistruar në materialet e Sigurimit të Shtetit si bashkëpunëtor me cilësinë informator, agjent rezident, strehues ose zotërues i një apartamenti të vënë në dispozicion nga Sigurimi i Shtetit gjatë periudhës 30.11.1944 deri më 01.10.1991. Së bashku me kategoritë e mësipërme, të përjashtuar nga marrja e dëmshpërblimit janë edhe: ish-anëtari i qeverisë komuniste, anëtari i Komitetit Qendror të Partisë së Punës së Shqipërisë, anëtari i Këshillit Presidencial komunist, së bashku me kryetarin e Gjykatës së Lartë, Prokurorin e Përgjithshëm dhe deputetë komunistë, përpara zgjedhjeve të 31 marsit 1991.

Në dukje, vendimi i parlamentarëve demokratë motivohet si një gjest humanizmi, kurse në të vërtetë nuk është tjetër, veçse një përdhosje e vlerave të vërteta antikomuniste. Jo vetëm, sepse vendosja e shenjës së barazisë midis xhelatit dhe viktimës bën pjesë në kategorinë dialektike të të kundërtave të papajtueshme, por sepse ajo pjesë e ish-nomenklaturës komuniste, e cila më vonë u bë viktimë e saj, nuk ka asgjë të përbashkët me të kundërtën e saj: disidencën dhe viktimat e kësaj të fundit. Sepse, Mehmet Shehu dhe pinjollët e tij, vërtet e pësuan pas daljes në konkluzion të Enver Hoxhës se ishin “çerdhe poliagjentësh”, por kjo ndodhi pas rreth 40 vjetëve kontribut të rëndësishëm në favor të zgjatjes, forcimit dhe konsolidimit të diktaturës komuniste dhe një jete prej “pashallarësh të kuq” që këta bënë. I njëjti vlerësim mund të qëndrojë edhe për Kadri Hazbiun, Beqir Ballukun, Feçor Shehun, Petrit Dumen, Sejfulla Malëshovën, Liri Belishovën, etj., të cilët, me amendimin e nenit gjashtë të ligjit dalin të barabartë me Musine Kokalarin, Lef Nosin, Nebil Çukën, Pjetër Arbnorin, Abdi Sharrën, Osman Kazazin, me grupin e deputetëve të pushkatuar barbarisht gjatë viteve të tetorit të kuq ’45-’48, me dy poetët, Vilson Bloshmi e Genc Leka dhe shumë figura të tjera që nuk ua përmend emrat për arsye vendi.

Përkundër kësaj nomenklature të ndëshkuar, nga lufta brenda llojit, deputetë dhe pinjollë pasues të idealeve dhe kauzave të kundërta me komunizmin përfunduan tragjikisht, jo si rezultat i kësaj lufte, por nga qenia kundërshtarë të bindur ideologjikë dhe politikë të regjimit komunist të Enver Hoxhës & Co. E përcaktojmë kështu, pasi njeriu që e drejtoi anijen e komunizmit shqiptar për më shumë se 40 vjet në këtë sipërmarrje nuk ishte i vetëm. Ai kishte nga pas edhe shpurën, ku bënin pjesë të sipërpërmendurit, së bashku me armatën e hetuesve, gjyqtarëve, spiunëve, denoncuesve etj., kategorive të ndëshkuara nga organet e drejtësisë së llojit të vet e që sot protestojnë për të përfituar dëmshpërblim.

Nisur nga këndvështrimi i periudhës postkomuniste shqiptare sipas optikës së Nurembergut antinazist, nuk është e tepërt të thuhet se amendimi i Nenit 6 të projektligjit “Për dëmshpërblimin e ish-të dënuarve politikë të regjimit komunist”, nuk është gjë tjetër, veçse stimulim i atavizmit komunist, që vazhdon të frymërojë në politikën shqiptare. Përkundrazi, lënia e tij në trajtë të pakorrigjuar le të shërbejë si hapi i parë i futjes së shoqërisë shqiptare në rrugën e dekomunistizimit real.

__________________
"Një burrë mund t?i japë dinjitet rangut të tij, por asnjë
rang s?mund t?ia shtojë dinjitetin një burri ? "

Denonco këtë mesazh tek moderatorët | IP: e regjistruar

Regjistruar: 02/02/2004
Vendbanimi: U.S.WASHINGTON
Mesazhe: 663

Veprat e veta i shkroi që nga qelitë e burgut. Në fshehtësi, futur mes kapakut të trashë të veprave politike të Enver Hoxhës, i dërgonte te familjarët e tij bashkë me letrat që i shkruante në ato ditë... Sot disa prej këtyre letrave zbulohen për të parën herë dhe rrëfejnë Pjetër Arbnorin në vitet e rinisë së tij.

Nuk bëhet fjalë për ndonjë vepër të botuar (megjithëse edhe kjo është në plan), por për një pjesë të intimitetit të Arbnorit, besuar Muzeut të Artit dhe Personaliteteve të ideuar nga Novruz Shehu.

Pikërisht dy letra të Arbnorit bashkë me një stilograf të tijin atij i janë dhuruar nga gruaja e Pjetrit, Suzana, dhe motra e tij, mikeshë e Musine Kokalarit, që ashtu si vëllai kaloi vite të tëra në burgjet e komunizmit. Por nuk janë vetëm letrat, “pasuria” që ruhet me dashuri nga gruaja e tij. Një ditar i Pjetrit, që i ngjason më së shumti një libri folklori, është pjesë e koleksionit. Vetëm se një ditar jo i thjeshtë, por “i koduar”, i cili fatkeqësisht është “dënuar” të qëndrojë në memecërinë e vet pa u deshifruar, pasi vetë Pjetrit i kishin humbur kodet për ta lexuar atë. “Megjithëse ai shkoi në Francë për të deshifruar këtë ditar, ngeli në memecërinë e përjetshme, vetëm duke dëshmuar se dikur ishte shkruar në burgjet e Spaçit dhe Burrelit”, - nënvizon Shehu sipas të dhënave të mbledhura nga familjarët e tij. Me vlerë është edhe korrespodenca e Arbnorit me personalitete të letërsisë dhe politikës botërore, që shumë lehtësisht mund të bëhet pjesë e veprës së plotë të tij, ende të pabotuar.

Për herë të parë ne po botojmë një letër të tij shkruar në burgun e Burrelit në fillim të vitit 1973...

Burrel 1.2. 1973

Shumë e dashuna Nanë Netë e Margeritë,

Me keqardhje të madhe mësova lajmin për sëmundjen e randë të hallës. Ka ditë që ma ndiente zemra këtë të keqe, sepse asnjiherë s’kishte ndodhë mos me dërgue halla urime për Vit të Ri. Edhe kësaj rradhe isha i sigurtë se s’e ka lënë prej harresës ose prej pritesës, por ndonji e keqe e madhe do ta kishte pengue.

Sado plak me qenë njeriu yt, ai të dhimet njilloj si me qenë në mushën ma të mirë, sidomos kur e ke dashur e të ka dashë. E unë prej hallës kam kujtime shumë të mira. Ju e dini se si i kemi pasë marrëdhaniet me ta në fillim.

Kishim nji ftohtësi që e kishin krijue rrethanat: jeta larg tyne, vdekja e babës, qëndrimi i tyne mënjanë kur ishim në vështirësitë e mëdha etj, etj. Afëria jonë me ta kishte përfundue te nji vizitë në vit a në gjashtë muej që shkëmbenim sa për njerëzi. Në këto rrethana jeta e solli që unë të largohem nga Shkodra e të kërkoj punë e jetesë në Durrës. Nuk e besoni se sa të randë e kam pasë në fillim me shkue te halla. Më dukej njilloj si me i zanë derën nji njeriu të largët. Doemos ma me qef do të kisha dashë me banue në hotel po të kisha të holla. Vitin e parë shkoja të shtunave e të dielave. Sa me u la e me u shlodhë. Mundohesha me i bezdisë sa ma pak, me ndejë sa ma pak, me ua diftue hallet vetëm kur s’kisha rrugë tjetër. Po tue kalue koha e tue u ngrohë zemra. Halla e Simoni, ç’asht e drejta, nuk më pritën aspak keq. Po njeriut nuk i mjafton kjo. Unë kisha nevojë për dashuninë e nanës e të motrave të cilat i kasha larg e i shifja krye disa muejsh. Dalëngadalë halla erdh tue m’u ba si nanë e dytë: më lante, më shpërlante, më gatuente, më flitte fjalë të mira, kjante halle me mue. Gjatë pesë vjetëve s’mbaj mend që të kemi shkëmbye asnjiherë qoftë edhe nji fjalë të keqe, s’di të më ketë ndejë nji herë me hundë, të më ketë dhanë me kuptue se po i randohem. Edhe Simoni më ka dashtë njilloj e nuk ma ka prishë zemrën asnjiherë. Vetëm se atij i mbette pak hatri se nuk çohesha heret në mëngjes për me thanë uratë me ta. Të dielave ajo më hekuroste rrobat e mundohej me më qitë sa ma mirë, me ato që kisha.

Sidomos në kohën e studimeve për universitet ajo më ka ndejë vazhdimisht te kryet. Rrinte deri në mesnatë me mue, kur më zente gjumi më shkundte lehtë e më jepte lapsën në dorë e më thonte: Çou, laj faqet e freskou nji herë se ke provimin mbasnesër e s’duhet të na koritësh. Kur kthehesha prej Tirane më pritte në balkon e i qeshte fytyra, kur e shifte se jam i gëzuem. E unë hapsha pesë gishtat prej larg për me i diftue se kasha marrë notën ”shumë mirë”. Kur e pau se çdo gjashtë muej po jepsha nga një vit të universitetit, nisi të shqetësohej për shëndetin tim e mundohej me më ushqye sa ma mirë. Po në anën tjetër edhe krenohej me mue. Kur mbas dy vjetësh e gjysë i diftova diplomën me shënimin “shkëlqyeshëm” më përqafoi me lotë në sy e atë drekë më bani nji ambëlsinë. Kuptohet që edhe unë kam qenë i rregullt ndaj saj dhe Simonit. Sa herë që u jepsha të hollat e muejit dhe nisshe të tjerat për ju, halla më pyette: “A të teproi gja?” E unë gjithmonë i përgjigjesha: kam, kam.

Të gjitha këto më kujtohen tashti që mora vesh për sëmundjen e saj dhe dhimja që ndiej asht shumë e madhe. Po gëzohem shumë që nuk paska qenë as kancer as cerozë hepatike e sa për verdhëzën atë do ta kalojë se ka fizikun e fortë. Keni ba shumë mirë që keni shkue në Durrës me e pa. Unë i kam dërgue nji kartolinë e besoj se e ka marrë tashti.

Me shëndet jam mirë, Të gjitha letrat tuaja i kam marrë. Qymyr kam deri në fund të marsit prandaj mos bini këtë rradhë, po rradhën tjetër. Edhe sakë kam mjaft. Vojin e peshkut do ta pi, veç kam frikë mos ngrohet koha derisa ta nisi vetë. Madje ju shënova në nji kartelë që të ma nisni me postë, po s’di a e keni marrë. Në prufshi lakna, ma bini nji gjysë kile mish thiu të njomë. Këndej nga na ka ba të ftohtë i vazhdueshëm, të premë e acar, por pa erë. Moti ka mbajtë i mirë. Tashti janë tue na rregullue nji dhomë ku me hangër bukë e në të ardhshmen na kanë thanë se do të shqyrtojnë furnizimin tonë me qymyr briket, me pagesë ose pa pagesë, si të vendoset. Do të ishte mirë shumë se do të shpëtojshi prej thesit të qymyrit që barni gjithnji. Tezes Lizë s’ka pse i mbetë hatri pse s’ja kam përmendë emnin në kartolinë. Hatri duhet të na mbesë ne prej saj. Kam nji pardesy të bukur për Netën, ishalla po i bjen e po i pëlqen. Më vjen keq që s’e paska marrë kartolinën Margerita. Ishte nji pamje shumë e bukur familjare. Florën e vogël e puth. Ju përqafoj të gjithëve.

Hallës shumë të fala. Të fala edhe Mihalit familjarisht.

Jueji Pjetri

Denonco këtë mesazh tek moderatorët | IP: e regjistruar