agata
idealiste
Regjistruar: 20/02/2004
Vendbanimi: Utopial
Mesazhe: 2981
|
Kur do shteroj mosbesim ndermjet partive...?
Partitë, "sytë katër" te komisionerët
Ekziston frika nga shitblerja. Tanimë, çdo gjë varet nga duart e tyre
Palët kanë ulur "shpatat" dhe janë larguar nga sheshbeteja, pas më shumë se dy muajsh përballjeje, tensionesh, përplasjesh. Tanimë sytë e të gjithë kryetarëve të partive, kandidatëve dhe mbështetësve, në 24 orët e ardhshme, janë fokusuar tek komisionet e KZAZ, të qendrave të votimit dhe të grupit të numërimit të votave. Beteja e partive është e fokusuar në duart e tyre. Dita e djeshme ka qenë mjaft intensive për shtabet elektorale të partive që kanë të drejtë të kenë anëtarë në këto grupe duke dhënë udhëzime se si duhet të veprojnë për të mos lënë palën tjetër të abuzojë. Mungesa e besimit mes subjekteve politike të dy krahëve e ka karakterizuar gjithë procesin përgatitor të zgjedhjeve, ndaj ndërrimi i anëtarëve sidomos të KZAZ-ve ka qenë një fenomen i dukshëm. Vetëm në dy javët e fundit, Komisioni Qendror i Zgjedhjeve ka pranuar shkarkimin e anëtarëve dhe ka miratuar emra të tjerë sipas propozimeve të partive politike. Fenomeni bëhet më problematik sidomos tek emrat e komisionerëve të qendrave të votimit dhe të grupeve të numërimit të votave. Komisionet e Qendrave të Votimit vijonin edhe dje pas mesditës të mos ishin të plotësuara ndërkohë që afati ligjor ka kaluar më shumë se 20 ditë. Frika e blerjes së komisionerëve nga kampi kundërshtar bën që partitë të mbajnë të fshehta deri në momentin e fundit emrat e të besuarve të tyre, ndërsa KQZ bëri thirrje për sjelljen e këtyre propozimeve sa më parë, pasi komisionerët duhet të kalojnë në procesin e trajnimit për të gjitha detyrat që u takojnë të kryejnë. Prej dy javësh, kryetari i Komisionit Qendror të Zgjedhjeve, Arben Ristani, ka bërë thirrje të herëpashershme që partitë politike të shlyejnë detyrimet e tyre karshi KQV-ve. Sipas tij, në këtë mënyrë rrezikohet të cenohen standardet zgjedhore. Komisioni nga ana tjetër ka pranuar se nuk ka çfarë të bëjë përballë fenomenit të tërheqjes së anëtarëve të propozuar në fillim dhe zëvendësimit të tyre në momentin e fundit. Detyrimi i tyre është që së pari të organizojnë trajnimet me propozimet fillestare sipas afatit ligjor. Komisionerët e Qendrave të Votimit janë udhëzuar që të jenë të kujdesshëm, jo vetëm të kryejnë detyrën e tyre sipas Kodit Zgjedhor, por edhe për të treguar vëmendje ndaj çdo tentative. Në këtë pikë, sidomos opozita duket shumë e organizuar. Më e lehtë duket situata në qytete të vogla dhe në komuna ku zgjedhësit e njohin njëri-tjetrin dhe mund të dallojnë lehtë nëse ndonjë prej tyre voton më shumë se një herë. Sa i përket partive që nuk kanë të drejtë të kenë anëtarë në këto komisione, situata paraqitet ndryshe. Të interesuarit për ta pasur të paktën vëzhguesin në KQV ashtu dhe në Grupet e Numërimit të Votave kanë qenë të angazhuar për të plotësuar listën sa më parë. Procesi zgjedhor nis sot në Komisionet e Qendrave të Votimit. Pasi qytetarët të shprehin vullnetin e tyre dhe fleta e votimit të hidhet në kuti, në mbrëmje do të nisë procesi i numërimit të votave.
Gazeta Shqip
__________________
Gjysma e asaj qe shkruaj ndoshta eshte e pa kuptimte per ju, por un e shkruaj qe gjysma tjeter te mund te arrije tek ju. FIRDUSI
Denonco kėtė mesazh tek moderatorėt | IP: e regjistruar
|