lezhjani-82
I Pavdekshem
Regjistruar: 02/01/2005
Vendbanimi: Eternity...
Mesazhe: 4813
|
Dorëheqja, letra sekrete e Mustafajt
Arben Rrozhani
01-05-2007
Dokumenti: Zbulohet korrespondenca diplomatike e ish-ministrit të Jashtëm me ambasadorin e Shqipërisë në Greqi
Letra e 16 marsit 2007: Probleme skandaloze në ambasadën shqiptare në Athinë. Ambasadori injoron Ministrinë e Jashtme
Ambasadorët e Berishës nuk përfillnin autoritetin e ministrit të Jashtëm, Besnik Mustafaj, dhe ata e injoronin atë, duke komunikuar me Kryeministrin apo ministra të tjerë. I përfolur si njëri prej shkaqeve që çuan në dorëheqjen e bujshme të ministrit Mustafaj pak ditë më parë, ky është një fakt i konfirmuar, i mbetur edhe në korrespondencën diplomatike mes ish-ministrit të Jashtëm, Mustafaj dhe ambasadorëve. E tregon edhe "posta përvëluese" Tiranë-Athinë dhe konflikti i ashpër mes ish-ministrit Mustafaj dhe ambasadorit të Shqipërisë në Greqi, Vili Minarolli. Këtë konflikt që gazeta "Shekulli" e renditi pak ditë më parë, si njërin prej shkaqeve për dorëheqjen e Mustafajt, e zbulon njëra prej letrave që Mustafaj i dërgonte mëse një muaj më parë ambasadorit, dhe që e disponon edhe gazeta "Shekulli". Është njëra prej dhjetëra korrespondencave që ish-ministri Mustafaj ka patur me ambasadorët e rinj, që u emëruan pas ardhjes në pushtet të PD-së në shtator 2005. Dhe sipas burimeve në Ministrinë e Jashtme, është njëra prej letrave më "përvëluese" që tregon raportet shumë të vështira mes ministrit dhe ambasadorëve politikë që dolën nga radhët e PD-së, për të përfaqësuar Shqipërinë nëpër botë.
***
Në letrën e nisur më 16 mars 2007 nga ish-ministri i Jashtëm, Besnik Mustafaj, në adresë të ambasadorit të Shqipërinë në Athinë, Vili Minarolli, rroket e gjitha problematika në njërën prej përfaqësive më të mëdha të Shqipërisë në botë, situata alarmante në stafin e selisë diplomatike, problemet me shumë prej anëtarëve të personelit dhe më e rëndësishmja, injorimi që diplomatët e kryeministri Berisha i bënin ministrit të Jashtëm.
Në pjesën e dytë të letrës, ministri i Jashtëm, Mustafaj i drejtohet ambasadorit në Athinë: "Më duhet po ashtu t'ju kujtoj, se zbatimi i kuadrit ligjor e normative të Shërbimit të Jashtëm është detyrë parësore e çdo nëpunësi, në radhë të parë e titullarit. Neni 20 i ligjit për shërbimin e jashtëm, pika 3, përcakton se "Shefi i Misionit përgjigjet drejtpërdrejt përpara ministrit të Punëve të Jashtme, për zbatimin e politikës së jashtme të të Republikës së Shqipërisë në shtetin pritës dhe vepron në përputhje me detyrat dhe përgjegjësitë e dhëna nga ky ligj, si dhe me drejtimet dhe udhëzimet e dhëna nga strukturat përkatëse në Ministrinë e Punëve të Jashtme".
***
Citimi i një pjese të ligjit për shërbimin e jashtëm, sipas burimeve nga Ministria e Jashtme, është tregues i durimit të sosur të ministrit Mustafaj ndaj ambasadorëve që komunikonin direkt me Kryeministrin apo ministrin e Brendshëm, duke injoruar shefin e tyre, ministrin e Jashtëm, Mustafaj.
Këtë fakt e pranon vetë ministri në vijim të letrës drejtuar Minarollit, që e cilëson "shkelës ligji", në të cilën shkruan: "Kjo nuk ju autorizon, në asnjë rast dhe në asnjë rrethanë, që të komunikoni me institucionet e tjera, për më pak me ato përgjegjëse për zbatimin e ligjit, duke anashkaluar Ministrinë e Punëve të Jashtme. Ju duhet ta dini se është Ministria e Punëve të Jashtme ajo që do të gjykojë, mbasi të verifikojë faktet sipas procedurave në fuqi, nëse ka arsye të mjaftueshme që kërkojnë impenjimin e strukturave të tjera shtetërore. Sipas ligjit, shkeljet e rënda shqyrtohen nga Komisioni i Gradave dhe Disiplinës, i cili merr vendimet që i gjykon të arsyeshme, në bazë të provave, procedurë e cila është gjerësisht e parashikuar nga kreu X i Rregullores për Shërbimin e Jashtëm. Duke bërë kallëzim të drejtpërdrejtë pranë Policisë së Shtetit, pa pritur verifikimin e thënieve tuaja, qofshin ato edhe të drejta e të cilat nuk mund të jenë të vetmet, ju keni shkelur ligjin dhe keni vënë në vështirësi Ministrinë e Punëve të Jashtme".
Në fund të letrës, duke i kërkuar ambasadorit ndryshimin e atmosferës në përfaqësinë shqiptare në Athinë, ministri Mustafaj nuk i kursen kërcënimet për të ndëshkuar shkaktarët e gjendjes skandaloze në ambasadën tonë në Athinë. "Në mungesë të këtyre përmirësimeve, në ushtrim të kompetencave që më jep ligji, do të shqyrtoj marrjen e masave të tjera".
***
Problemet e mosmarrëveshjeve mes kryeministri Berisha dhe ministrit të Jashtëm, Mustafaj, për përplasjet mbi ambasadorët politikë, ishin një prej shkaqeve të dorëheqjes së papritur pak ditë më parë. Largimi i tij dhe emërimi i ministrit të ri, Lulzim Basha, nuk ka ndryshuar asgjë, sepse ambasadorët politikë, deri dje zyrtarë në selinë blu, vazhdojnë të përfaqësojnë Shqipërinë.
Ata do të vijojnë mënyrën e deritanishme të prezantimit të Shqipërisë, veçanërisht me një ministër që nuk asnjë të shkuar në krye të diplomacisë dhe me një të shkuar aspak të lavdishëm në krye të Ministrisë së Punëve Publike, Transporteve dhe Telekomunikacioneve.
Skandalet në ambasadë
"Minarolli, marrëdhënie problematike me personelin e selisë diplomatike"
Shqipëria prej vitesh ka në Greqi përfaqësinë më të madhe diplomatike, kjo për vetë faktin se atje është një komunitet prej rreth 800 mijë shqiptarësh, emigrantë ekonomikë që prej 16-vitesh punojnë dhe jetojnë në shtetin grek.
Por, sipas njoftimeve që ka marrë me rrugë diplomatike, ministri i Jashtëm, Mustafaj nuk ka qenë aspak dakord me mënyrën se si është drejtuar selia diplomatike, prej fillimvitit 2006, kur në krye të saj u emërua si ambasador Vili Minarolli. Mustafaj i drejtohet Minarollit: "Ministria dhe unë personalisht u kemi kushtuar vëmendje të posaçme krijimit të kushteve sa më të përshtatshme të punës, në përfaqësinë që ju drejtoni. Ne u kemi kushtuar po ashtu të njëjtën vëmendje, të gjitha çështjeve të ngritur nga ju si titullar. Ne kemi ndjekur me përparësi dhe u jemi përgjigjur në vijimësi sugjerimeve tuaja për lëvizje në personel, kemi bërë adaptimet e nevojshme, me qëllimin e vetëm për t'u dhënë juve sa më shumë lehtësira në përmbushjen e detyrës që keni marrë përsipër.
Por konstatoj me keqardhje se, me gjithë këto masa, situata ka shkuar në përkeqësim. Nga shqyrtimi i vëmendshëm i saj, rezulton se marrëdhëniet tuaja me një pjesë të madhe të personelit të ambasadës janë shumë problematike dhe ndikojnë drejtpërdrejt në cilësinë e aktivitetit të përfaqësisë. Jam i bindur se në një situatë të tillë normale, i takon titullarit të marrë vetë masat për të ndërtuar në përfaqësi marrëdhëniet e punës dhe ato njerëzore të tilla, që krijojnë një atmosferë të përgjithshme pozitive. Jam po aq i bindur se kur titullari nuk është në gjendje t'u bëjë ballë problemeve që has, kur veprimet e tij nuk zgjidhin problemet, por i acarojnë ato më tej, i takon Ministrisë së Punëve të Jashtme të gjejë zgjidhjet që ajo i gjykon si më të dobishmet për mbarëvajtjen e punës".
Marre nga "Shekulli"
__________________
Jeta eshte nje semundje vdekjeprurese seksualisht e transmetueshme.
Denonco kėtė mesazh tek moderatorėt | IP: e regjistruar
|