arturm
Veteran ne forum
Regjistruar: 06/12/2006
Vendbanimi: itali
Mesazhe: 1195
|
Urime zoti Nishani
Banalizimi final i Presidencës
Nga Mero Baze
Për shkak të mos marrjes seriozisht të Presidentit Nishani, media ka anashkaluar lajmin për stafin e ri të Presidentit dhe cilësinë e tyre. Por një vështrim i shpejtë mbi emrat që do të jenë pjesë e kabinetit të Presidentit të ri, të japin një pamje më të qartë dhe më të plotë për nivelin banal të Presidencës Nishani dhe standardit vulgar që po fiton qytetari në institucionet tona.
Për aq sa unë i njoh, shikoj tre kategori të punësuarish. Një pjesë janë njerëz mediokër të nivelit më të ulët të mundshëm të shoqërisë sonë, një pjesë janë kleptokratë të administratës, me të cilën familja Nishani ka bërë paratë vitet e fundit, dhe një pjesë janë aq të panjohur sa as në Google nuk u del emri.
Tri këshilltarët kryesorë të Presidentit, ai diplomatik, politik dhe juridik, janë tre njerëz, të cilët njësoj si Presidenti nuk gjejnë dot punë po i hoqe nga zyrat e shtetit dhe partisë. Këshilltari diplomatik është një prurje mediokre në shërbimin diplomatik nga Shërbimi Informativ i kohës së Gazidedes, që ka punuar në ambasadën tonë në Beograd. Nuk di në ia mundësoi ky telefonatën me Daçiçin presidentit Nishani, por nëse e ka bërë atë, është një arsye që të mos lejohet të punojë më as në zyra shteti dhe jo më këshilltar presidenti. Nuk dua ta përgojoj publikisht për nivelin e tij mediokër si diplomat, pasi ashtu janë shumica e diplomatëve tanë të rangut të dytë e të tretë siç është ai, por guximi për të qenë këshilltar diplomatik i Presidentit, është i frikshëm.
Këshilltari juridik, që do të zëvendësojë Spiro Peçin apo Artur Metanin, është një ish gjashtëmujorësh që as administrata e Berishës nuk e ka pasur standard ta ripunësonte pas vitit 2005. Ne e kuptojmë që stafi i Presidentit nuk do ketë shumë punë me ligjin, pasi për të do të kujdeset Berisha, por standardi i përfaqësimit në atë nivel është fyes për institucionin. Që nga koha që Berisha ka qenë president e deri më sot, stafi juridik i presidencës ka pasur vazhdimësi. Nga dy ish këshilltarët e Berishës, Sollaku dhe Rusmali, njëri prej tyre vazhdoi me Meidanin, pra Sollaku. Artur Metani i Meidanit vazhdoi me Moisiun dhe Topin. Spiro Peçi, një nga ministrat më të aftë të drejtësisë dhe një kokat më të ftohta të politikës shqiptare në fushën e drejtësisë, ishte një nga peshat e rënda të presidencës Topi. I zëvendësuar me atë emër që Nishani ka bërë publik, është një poshtërim kryekëput për institucionin e Presidencës. Por dhe këtu mundimi të shkon kot, pasi të gjithë nxitojnë të të thonë se askush nuk e merr seriozisht këshilltarin juridik pasi është Berisha ai që këshillon.
Skandali vazhdon me princin trashëgimtar Leka I. Ne do të jemi republika e parë në botë, ku Presidenti i Republikës ka këshilltar politik pretendentin për fronin mbretëror, pra kundërshtarin e formës kushtetuese të vendit. Edhe pse të gjithë e dimë që trashëgimtari i fronit tonë nuk ka pretendime dhe ka plot halle private për të pasur mendjen tek froni, gjesti është poshtërues për institucionin e Presidencës. Për më tepër posti i tij si këshilltar politik është në kundërshtim parimor me principet e një republike parlamentare. Por edhe këtë nuk e merr askush seriozisht, pasi kanë në mendje Princin Leka, pafajësinë e portretit të tij për gjërat që ndodhin rrotull tij dhe në emër të tij, dhe natyrisht pafuqinë e tij për të qenë një këshilltar.
Një kategori e dytë e rrezikshme përveç të paaftëve, është ajo e shefit të kabinetit. Nëse keni qenë të vëmendshëm vitet e fundit ndaj këtij emri, keni parë disa greva urie për pronat në Vlorë, disa ish pronarë që u rrëmbehen pronat dhe vilat dhe parullat e tyre të mëdha ku shkruhet Hajduti Florian Nuri
. Është fjala për njeriun që ka qenë vazhdimisht shef kabineti i Bujar Nishanit kudo që ai lëviz dhe që i ka përdorur si policët dhe gjyqtarët për afera pronash dhe presione mbi ish- pronarë. Kjo shpjegon faktin pse familja e gruas Nishanit fare papritur ka mundur të marrë çdo pronë dhe ndoshta më shumë se sa i takojnë dhe se si pronarë të vjetër në Vlorë grabiten nga gjyqtarë dhe policë pas të cilëve shfaqet gjithmonë emri i këtij tipi.
Nuk dua të flas pastaj për një kategori të tretë emrash, të cilët nuk i njeh askush, por ndoshta janë lidhje personale dhe familjare të Nishanit, e vetmja mendësi që funksionon për një tip turkoshak kur ndërton një staf. E sigurt është se ky staf presidence përmbledh në vetvete gjithë tiparet e kësaj presidence të padobishme edhe për vetë pushtetin. I vetmi i deleguar serioz i pushtetit aty, është Sekretari i Përgjithshëm i Presidencës, Bardh Spahia, i cili do të jetë mëkëmbësi real i kryeministrit në Presidencë, kurse pjesa tjetër e stafit është një tufë njerëzish pa asnjë sistem vlerash, përveç faktit që disa i njeh Bujari, disa familja e tij dhe të gjithë bashkë do marrin rrogat dhe do sillen rrotull me paret tona në emër të institucionit të presidencës. E di që do thoni përsëri se nuk ka rëndësi pasi ne e dimë kush është president, por kur ti njihni, do ndërroni mendje. Kurrë ska për të qenë më keq se kaq, më poshtë se kaq, më banale se kaq, më e turpshme se kaq dhe më fyese se kaq për atë institucion.
Denonco kėtė mesazh tek moderatorėt | IP: e regjistruar
|
28 Korrik 2012 21:47
Forumi Horizont > Media dhe Politika > Politika Shqiptare > Urime zoti Nishani
